Read Paite Chin JOSHUA 9 Bible Online

JOSHUA 9 - Paite Chin bible

JOSHUA 9

¹Huan, hichi ahi a, Jordan gal a kumpipa tengteng, tang a omte, phaizang a omte, tuipi zatak dung teng a Lebanon pha a om tengteng, Hitte, Amorte, Kanante, Perizte, Hivte leh Jebuste’n a na zak un,

²Joshua leh Israelte pheikhai khat a dou tum in a kikhawm uhi.

³Himahleh Gibeon khomite’n Joshua in Jeriko khua leh Ai khua a bawl dan a na zak un, lepchiah pil in a gamtang uhi.

⁴Palai a kibawl in iplui pipi, uain thawllui pipi, a sesa kithuap nemnum sabiltungte a pua in mi a kisawl uhi.

⁵Khedap lui thuap nennon a bun ua, puan lui pipi a silh ua, a nekding tanghoute uh gaw gemgom, ap khetkhut ngen ahi.

⁶Gilgal giahphual ah Joshua kiang ah a va hoh ua, a kiang leh Israelte kiang ah, “Gamlapi apan hongpai ka hi ua, huaiziak in tuin kou leh nou lemna thu khung ni” a chi uhi.

⁷Israelte’n huai Hivte kiang ah, “Ka lak ua teng hi kha ni u chia; bangchi’n nou toh lemna thu i khung thei dia?” a chi uh.

⁸Amau Joshua kiang ah,“Na sikhate ka hi uh,” a chi uhi. Joshua in a kiang uah, “Kuate na hi ua? Koilam apan hongpai na hi ua?” a chi hi.

⁹Amau a kiang ah, “TOUPA a Pathian min uh ka zak ziak un na sikhate gamlapi apan hongpai ka hi uh. A minthan dan, Aigupta gam a a thilhih tengteng,

¹⁰Jordan lui gal a Amorte kumpipa nihte, Heshbon gam kumpipa Sihon, Bashan gam kumpipa Astaroth khua a om Og tung a a thilhih tengteng ka naza uhi.

¹¹Ka upate uh leh ka gam ua tengte’n ka kiang uah, ‘Lampi a nekding tawi unla, amau vahoupih un, a kiang uah, “Na sikha ka hi uh. Nou toh kilem ni, na va chi ding uh”’ chi’n a honsawl uhi.

¹²“Hiai ka nekding uh tanghoute na kiang a hongdia kongpawt ni ua ka inn ua kipan a sa a k’on puak uh ahi. Himahleh tuin en dih, a gaw gemgoma a ap khetkhutta hi.

¹³Hiai thawl uain ka thunnate uh leng a thak ahi. En dih, a vang khinvek hi. Hiai ka puante uh leh ka khedapte uh leng ka hong paina uh a gamla mahmah a, a luigawpta hi” a chi uhi.

¹⁴Mite’n a tawi uh nek leh dawn dingte a chiam ua, TOUPA dong in thu a kan masa kei uhi.

¹⁵Huchi in Joshua in amau toh kilemna a bawl a, amaute hawi din amau toh thu a khungta hi. Paikhawm miliante leng a kiang uah a kichiam uhi.

¹⁶Hichi ahi a, a kiang ua thu a khun ua kipan ni thum nung in, a khopite uh amau kiang nai a tengsam ahi uh, chih a thei kheta uh.

¹⁷Israel suante a kipan khia ua, a ni thum ni’n a khopite uh a va tung uhi. A khopite uh Gibeon, Kephirah, Beeroth leh Kiriath-jearim ahi uh.

¹⁸Paikhawm miliante’n TOUPA, Israelte Pathian minlou a a kiang ua a na kichiamtak ziak un, Israel suante’n a khoih kei uh. Huchi in paikhawm tengteng miliante tung ah a phun uhi.

¹⁹Himahleh milian tengteng in paikhawm tengteng kiang ah, “TOUPA, Israelte Pathian minlou in a kiang uah i na kichiamta ngal ua. Huaiziak in amaute i khoih uh sianglou ahi.

²⁰Hichibang in a tung uah hih ni. I hinghawi mai ding uh. Huchi lou in zaw i tung uah thangpaihna a hongtung kha ding, a kiang uah lah i na kichiam khinta ngal ua” a chi uhi.

²¹Miliante mah in a kiang uah, “Hinghawi in om uhen. Himahleh paikhawm tengteng adia sing pawmite leh tui tawimite hi uhen” a chi uhi; miliante’n a na chiamkhit tak bang un.

²²Joshua in amaute a samsaka, a kiang uah, “Bangdia, gamlapi apan hongpai ka hi uh, chi a hon zekhem na hi ua? Ka kiang nai a tengsam lah na hi ngal ua.

²³Huaiziak in tuin hamsiat na hi uh, na lak ua mi kuamah ka Pathian inn adia singpawmi leh tuitawimi na hihna ua pan a suakta ngeikei ding uh” a chi hi.

²⁴Amau Joshua a dawng ua, “TOUPA na Pathian un a sikha Mosi gam pumpi nou honpe dia, a gam luah mi tengteng na ma ua kipan a hihmang zel ding ahi, chih thu a na piak, na sikhate a hon na hilhchian mahmah ua; huaiziak in noute ziak a ka hinna uh mansuah ka lau mahmah ua, hichibang in ka gamta uhi.

²⁵Tuin ngai in, na khut a om ka hi ua; na ngaihtuahna a hoih leh dik a na theih bang in ka tung uah hihmai in” a chi uhi.

²⁶Hichi ahi a, Israel suante apan Joshua in hunkhia in, a thatta kei uhi.

²⁷Huai ni’n Joshua in a seh bang in paikhawmte leh TOUPA maitam adia singpawmite leh tuitawimite in a sep a, tunitan in hiaite in a pang uhi.