Read Paite Chin 2 THESSALONIKATE 1 Bible Online

2 THESSALONIKATE 1 - Paite Chin bible

2 THESSALONIKATE 1

¹Paul, Silvana leh Timothi in, Pathian i Pa leh Toupa Jesu Khrist a Thessalonika khua a saptuamte kiang ah:

²Pa Pathian leh Toupa Jesu Khrist kiang a kipan hehpihna leh lemna na kiang uah om hen.

³Unaute aw, na ginna uh nakpitak a khanglian in, navek ua na ki-ittuah chiatna uh a khan semsem ziak in noumau tungthu ah Pathian kiang a kipahthu gengen ding him ka hi uh: huai ka hihtuak him uh ahi.

⁴Huchi in min a honsawina tengteng uleh gim na thuaknate ua na kuhkal dan uleh na ginna ziak un Pathian saptuam pawlte lak ah kou k’on suang uhi.

⁵Huai Pathian vaihawmna a diktat chih chiamtehna ahi a, Pathian kumpi gam ziak a na thuak uh leng tu a kumpi gammi a sehtak na hi uh chih kilatna semsem ahi.

⁶Pathian in nou hon hihgimte gimthuakna a thuk diktathuai in a septa hi.

⁷Toupa Jesu van a kipan a angel hatte toh meikuanga hong kilak chiang a, nou hihgima omte kou toh khawlna a honpe ding hi.

⁸Pathian theilou mi leh i Toupa Jesu Tanchinhoih taksangloute tung a phu a la ding hi.

⁹Amau tangtawn manthatna a gawtna leh Toupa omna leh a thilhihtheihna thupina a kipan a pawsiahna a thuak ding uhi,

¹⁰Amah a hongpai chiang in misiangthoute hihthupi in a om ding ua, gingtute tengteng lamdangsak a om ding uhi, k’on thu theihsak uh na gintak ziak un nou leng amaute lak ah na telsam ding uhi.

¹¹Huchi a hihthupi leh lamdang sak a hih theihna ding a i Pathian in nou a honsapna a saptuak him a honsak theihna ding in leh, hoih utna chiteng leh ginna nasep chiteng a thilhihtheihna a hon lohchinsak theihna ding in nou adin k’on thumsak gige uhi;

¹²Huchi a i Pathian leh Toupa Jesu Khrist hehpihna bangzel a i Toupa Jesu min noumau a hihthupi a om a, noumau leng amah a hihthupi a na om theihna ding un.