Read Paite Chin 2 THESSALONIKATE 2 Bible Online

2 THESSALONIKATE 2 - Paite Chin bible

2 THESSALONIKATE 2

¹Himahleh unaute aw, i Toupa Jesu Khrist hongpaina leh amah tuakdinga i vakikhopna ding thu ah:

²Toupa ni a tungkhinta chihna kha in hiam aw, thu ziak in hiam aw, kou a kipan a laikhak ziak in hiam aw, na lungsim uh a linpah louhna ding in leh na buailouhna ding un k’on ngen uhi.

³Kuamah in bangmah in honkhem kei uhen; puksannatak a hongtun masak phot a, khelhna mipa, mangthang tapa ngei a hong kilat kei leh huai ni tunglou ding ahi.

⁴Amah Pathian a hihsak peuhmah uleh, sabiak tengteng dou in, a tung ua om tum in a kihihthupi ding: huchi in Pathian tempula tuin Pathian bang hial in a kitung khe ding hi.

⁵Na lak ua ka omlai in leng huaibang thu k’on hilh zel chih na theigige kei ua hia?

⁶Amah hun tuam a a hong kilat theihna ding in bang in kham hiam chih na thei uhi.

⁷Danlou a omna thuguk in tuin leng a sem lellel ngal a, himahleh lakmang a a om masiah tua a khampa’n huchibang in a kham ding hi.

⁸Huai lakmang chiang in dan a talekpa a hong kilangta dia, Toupa Jesu’n a kam hatna in a that dia, a hongpaina leh kilakna in a hihmang ding hi.

⁹Huai dan a talekpa a hongpaina Setan sepdan bangzel in, thilhihtheihna chiteng, chiamtehna chiteng, zuau thillamdang chiteng toh,

¹⁰Mangthang lelte ding in khemna gilou chiteng toh ahi ding; hotdam a a om theihna ding ua thutak itna a pomlouh ziak un.

¹¹Huaiziak in zuauthu a gintakna ding un, Pathian in diklouhna nasep a kiang uah a honsawl ding hi.

¹²Thutak gingtalou a diktatlouhna a kipak zawte’n siamlouh a tanvek theihna ding un.

¹³Unau Toupa ngaihtakte aw, Kha hihsiangthou leh thutak gingta a hotdam a om ding in a tung a kipan Pathian in nou a hontel ziak in na tungthu uah zaw Pathian kiang ah kipahthu genzel ding him ka hi uhi.

¹⁴Huchibang ding in aman i Toupa Jesu Khrist thupina tang ding in ka Tangchinhoih un nou a honsam hi.

¹⁵Huchi in unaute aw, ding kip unla, kam a ka thugen uleh laikhakte a nou k’on sinsakte uh lenkip un.

¹⁶Huchi in i Toupa Jesu Khrist mahmah leh Pathian i Pa, eite honitpa leh hehpihna ziak a tangtawn a khamuanna leh lametna hoih hon pepan,

¹⁷Na lungtangte uh hih khamuangin, thil hoih hih leh thugen chiteng ah hon hihkip hen.