Read Paite Chin 2 THESSALONIKATE 3 Bible Online

2 THESSALONIKATE 3 - Paite Chin bible

2 THESSALONIKATE 3

¹A tawppen in unaute aw, Toupa thu noumau lak a a om bang in, khang a hihthupia a om theihna ding leh,

²Migenhakte leh migiloute lak a ka bit theihna ding un, hon thumsak un; mi tengteng in lah ginna a neivek kei uhi.

³Himahleh Toupa a muanhuai a, aman noute hon phutkip in gilou apan a honveng ding hi.

⁴K’on thupiak peuhmah uh na hihzou ua, na hih zelzel u leng Toupa ah k’on gingta uhi.

⁵Toupa’n na lungtangte uh Pathian itna ah leh Khrist kuhkalna ah pilut hen.

⁶Huan unaute aw, koute a kipan a thuhilhna a muh bang ua omlou nasep thadah, danlou bang a om unau tengteng apan kihemkhe ding in i Toupa Jesu Khrist min in thu ka honpia uhi.

⁷Na kiang ua ka omlai un, danlou bang in ka gamta ngeikei uh chih leh noumau mahmah in n’on zuihdan ding uh na thei uhi.

⁸Kuamah khut a kipan a thawn in na tanghou uh leng ka ne ngeikei uhi; noute k’on tuailuai saklouhna ding un sun leh zana gim leh tawltaka semkawm in ka ne zel uhi.

⁹Huai thuneihna ka neihlouh ziak uh hilou in, ka omdan uh na zuih ding ua etton ding honpia ka hi zaw hi.

¹⁰Na kiang ua ka omlai un: kuapeuh in nna a sepnop kei leh a nek leng ne kei hen, chi in thu ka honpia uhi.

¹¹Na lak ua khenkhat danlou a omte tungtang ka za uhi, huaite’n na himhim a semkei ua, midangte nasep ah a kichinglah zaw uhi.

¹²Huchi a hih chiang in, huai mite nasem hiathiat ding leh amau tanghou ne ding in Toupa Jesu Khrist ah thupia in ka hanthawn uhi.

¹³Unaute aw, nou zaw thil hoih hih chimtak kei un.

¹⁴Huan kuapeuh in hiai ka laikhak ua ka thu uh a zuih kei uleh, na kithuahpih hetlouhna ding un chiamteh un, a zum theihna ding in.

¹⁵Ahi, melma bang in enkei unla, unau bang in hilhzaw un.

¹⁶Huan muanna Toupa’n tangtawn in banglam peuh ah nou hon khamuan hen. Toupa na vek ua lak ah om hen.

¹⁷Kei, Paul in, keimah khut a hiai chibaibukna ka gelh ahi; hiai ka laikhak teng ah chiamtehna ahi; hichibang ka gelh dan ahi.

¹⁸I Toupa Jesu Khrist hehpihna na vek ua kiang ah om hen. Amen.