Read Paite Chin 1 TIMOTHI 1 Bible Online

1 TIMOTHI 1 - Paite Chin bible

1 TIMOTHI 1

¹Paul, Pathian thupiak bang a i hondampa leh i lamet Toupa Jesu Khrist sawltak in:

²Ginna a ka ta taktak Timothi kiang ah: Pathian, i Pa leh, Khrist Jesu, i Toupa kiang a kipan hehpihna, zahngaihna, khamuanna na tung ah om hen.

³Masidonia gam a ka hohdek lai a k’on nget bang in Ephesa khua ah om gige in, huchi a mi khenkhat gindan tuam sinsaklou ding a na hilh theihna ding in.

⁴Huan Pathian lam a phattuamna, ginna a o pen hilou, kiselna leh gintakthu gen omsak lel tangthu leh khangthu suizohlouh peuh buaipihlou ding a na hilh theihna ding in:

⁵Eite’n thuhilh ding i kep pen bel lungtang siangthou leh sialehpha theihna siang leh ginna taktak a kipan a pawt itna ahizaw hi.

⁶Mi khenkhatte’n hiaite pialsan in thuginalou genna lam ah a vakmang uhi.

⁷A thugen uh leh thil ahi a a gente u leng bang ahia chih theiloupi in dan sinsakmite hih a ut uhi.

⁸Min a zat hoih leh Dan a hoih chih i thei uhi.

⁹Ahi a, dan zaw mi diktatte ading a bawl ahi kei a, dan kalhte leh danlou a omte ading, Pathian limsakloute leh mikhialte, mi siangthouloute leh Pathian zahloute, pate thatte, nute thatte, mihing thatte;

¹⁰kingaihhatte, tawkawhukte, mihing gute, zuautheite, kichiam khemkhemte ading leh thil dang thugin toh kituaklou himhim te ading leh,

¹¹Ka kiang a kepsak a om Pathian Tanchinhoih thupi hilhna dik kalhte ading ahi.

¹²A hon hihhatpa Khrist Jesu i Toupa kiang ah kipahthu ka gen hi, muanhuai a honsaka, a nasempa dia a honchih tak ziak in.

¹³Tuma lam in Pathian gensepa leh sawipa leh hihsepa na hita mah leng; gingtaloupi leh theilou a hih ka hih ziak in ahi zahngaihna ka na muh tak.

¹⁴Huan i Toupa hehpihna ginna leh Khrist Jesu a itna in nakpitak in a dimletta hi.

¹⁵Khrist Jesu khialte hondam ding in khovel ah a hongpai chih a taksanhuai in a laktuak mahmah hi. A lak ua khialpen ka hi;

¹⁶Himahleh hiaiziakin ahi zahngaihna ka na muh: Jesu Khrist in a dohzohna kim a khialpen keimah a a latsak theihna ding ahi, tuban siah tangtawn hinna muhna ding a Amah hon gingta dingte adia etsakna hi ding in.

¹⁷Kumpipa tangtawn a om, sitheilou, muhtheihlouh, Pathian tak kia, tangtawn a zahtak leh thupi in om hen, Amen.

¹⁸Ka tapa Timothi aw, na tungtang genkholhnate toh kituakin hiai mohpuakna leh thuhilhna konpia hi, huchi a huai thute hilh a, kidouna hoih na dou theihna ding in,

¹⁹Ginna leh sialehpha theihna siangtak len chinten in, Mi khenkhatte’n huai sialehpha theihna paikhia in ginna lam ah long sia bang in a kekseta uhi;

²⁰Huaite lak ah Himenaia leh Alexander a pang uhi; Pathian a gensiat louhna ding un amaute Setan ka peta hi.