Read Paite Chin 1 TIMOTHI 2 Bible Online

1 TIMOTHI 2 - Paite Chin bible

1 TIMOTHI 2

¹Huchi in a masapen in thilnget thumnate, thumna himhimte, thumsaknate, kipahthu gennate, mi tengteng ading a bawlsak ding in k’on hanthawn hi.

²Kumpipate leh thuneite tengteng ading in leng; Pathian limsak leh zahtakhuaitaka kituaka khamuanga i om theihna ding in.

³Huai tuh i Hondampa Pathian theih in a hoih in, a kipahhuai hi.

⁴Aman mi tengteng hotdam a om ding leh thutak thei ding in a deih hi.

⁵“Pathian khat kia a om, Pathian leh mihing kikal ah Palai khat kia a om nawn,

⁶Amah mihing ahi, Khrist Jesu, mi tengteng tatna dia kipepa pen.” Huai theihpihna a huntak a piak ahi

⁷Hiai hihding a tangkoupihpa ding leh sawltak a seh ka hi, Khrist ah thu taktak ka gen, ka zuau kei; ginna leh thutak a Jentelte hilhpa a seh ka hi.

⁸Pasalte’n munchih a khut siangthou zak in, thangpai lou leh ginglel lou in thum le uh ka deih hi.

⁹Tua bangmah in numeite zumthei leh omdan siam in puansilh kilawm lel in kivan le uh; samphek, dangkaeng, tuikepsuang leh, puan mantam taktakte a kivanlou in:

¹⁰Himahleh numei Pathian limsak kichite a kihun lel in thilhih hoih in kivan le uh ka deih hi.

¹¹Numei in thumang hiathiat in om dinden in zil hen.

¹²Himahleh numei in thu a hilhzaw ka phalkei, pasal tung a thuneih leng ka phal sam kei, dai dinden in omzaw hen.

¹³Adam siam masak ahi a, huai nung in Evi siam ahi.

¹⁴Adam khem in a omkei a, numei khem in a om a, tatlekna ah a pukta hi.

¹⁵Numei in omdan siamna toh ginna leh itna leh siangthouna a a om gige leh nau pianna ah hotdam in a om ding hi.