Read Paite Chin 1 TIMOTHI 3 Bible Online

1 TIMOTHI 3 - Paite Chin bible

1 TIMOTHI 3

¹Kuapeuh saptuam heutu apan ut in nasep hoih a ut ahi, chih a dik ahi.

²Huchi in saptuam heutu tuh gensiatbei, zi khat nei, kidek thei, navak tak, mi diktat, mi paktakdan siam, thuhilhsiam,

³uain khamhatlou, mivuak hatlou mi nunnem a hi ding hi, selhatlou, sum deihta lou,

⁴zahtakhuai tak a tate kemsiam, amah inn sung kizentak a vaihawm siam mi ahi ding hi.

⁵Min amah inn sung vaihawm nangawn kizentak a a hihsiam kei leh bangchi’n ahia Pathian saptuam a kep theih ding?

⁶Gingthakmi ahi ding ahi kei, huchilou in zaw a kisathei kha dia, Diabol siamlouh tansakna ah a pukkha ding hi.

⁷Huaite lou leng pawlam a mite phat in a om nalai ding ahi, huchilou in zaw gensiat a a om in Diabol thang ah a awk kha ding hi.

⁸Huchibang in saptuam Upa mi zahtakhuai ahi ding uh ahi; kamtamte, uain haite, lepna nin a huaiham mite ahi ding ahi kei;

⁹sialehpha theihna siang a ginna a thuguk kemmi ahizaw ding uhi.

¹⁰Huan huaite leng chet in om masa uhen, huai nung in gensiatbei a hong hih uleh saptuam Upa na sem uhen.

¹¹Huchibang in a numeite uh leng mi zahtakhuai ahi ding uhi, gensiat hatlou, kidekthei leh bangkim a muanhuai ahi ding uhi.

¹²Saptuam Upa zi khat nei a tate uleh amau inn sung vaihawm navaktaka hihmi hi uhen.

¹³Saptuam Upa na hoihtak a semte’n amau ading in phattak hihna a loh ua, huan Khrist Jesu a om ginna a muanna leh hangsanna thupitak a mu uhi.

¹⁴Sawtlouchik chiang a na kiang a hongpai lamen in hiai thu na kiang ah ka gelh ahi;

¹⁵Himahleh ka hongom sawt khak leh Pathian inkuanpihte lak a mi bangchibang in ahia a om ding uh chih na theihna ding in ka gelh ahi; Pathian inkuanpihte Pathian hing saptuamte, thutak khuam leh kingakna ahi uhi.

¹⁶Pathian biakna thuguk nial vuallouh in a thupi hi: “Pathian sa a muhtheih a latsak in a om a, Kha a siamtansak, Angelte muh, namte lak a tangkoupih, khovel a mite gintak, thupina a pitouh ahi.”