Read Paite Chin 1 TIMOTHI 4 Bible Online

1 TIMOTHI 4 - Paite Chin bible

1 TIMOTHI 4

¹Himahleh tunung chiang in mi khenkhatte’n; pimangna khate leh dawite thuhilhna limsak in, ginna a hon tawpsan ding uh chih Kha in kichiantak in a gen hi: huai tuh,

²mi zuautheite lepchiahna ziak in ahi; huai mi zuautheite amau sialehpha theihna ngei a sikam a halkeu bang ahi uhi.

³Kiten a kham ua, nekding ante, thutak thei a gingta te’n kipahthugena sandinga Pathian in a siamte, neklouh ding a chi uhi.

⁴Pathian thilsiam chiteng a hoih ngal a, kipahthugen a san a hihkhit phot leh bangmah deihlouh ding ahi kei hi;

⁵Pathian thu leh thumna a hih siangthou ahi khinta hi.

⁶Huaite unaute na theihsak leh Khrist Jesu nasempa hoihtak, ginna leh thuhilhna hoih tutan a na zuih thu a vaklian na hi ding hi.

⁷Himahleh Pathian zahlouhna leh tangthu bulbal neiloute deih ken. Pathian limsak ding in kithuzoh in;

⁸Sapum kithuzohna a phatuam zeka; Pathian limsakna pen tangtawn in, tua omsa hinna leh hongom nawn ding piak chiamna a neih ziak in thil tengteng ah a phatuam hi.

⁹Hiai thu a muanhuai in a laktuak mahmah hi.

¹⁰Huchi in Pathian hing i muan ziak in i semgim ua, i pang teitei uhi; amah mi tengteng Hondampa ahi a, a gingtate Hondampa ahi tuanse hi.

¹¹Hiai thute pia inla, thuhilh in.

¹²Na naupanna kuamah musit sak ken; thugen ah, tatdan ah, itna ah, kha ah, ginna leh siangthouna ah, gingtute zuih ding hizaw in.

¹³Ka hongpai masiah laisim, hanthawn leh thugin, limsak in.

¹⁴Nang maha om thilpiak thugenkholhna a piak, upate khut ngak a Pathian in nang a hon neihsak limsaklou ken.

¹⁵Mi tengteng kiang a na phattuamna a lat theihna ding in huai thilte ah thanuam inla, kizang zou in.

¹⁶Nangmah leh na thuhilh ah pilvang in; huai thilte hih in om gige in; huchibang hih in nangmah leh na thuzate na hondam ding hi.