Read Paite Chin 1 TIMOTHI 5 Bible Online

1 TIMOTHI 5 - Paite Chin bible

1 TIMOTHI 5

¹Upa deuhte tai kenla, pa bang in thuhilh in; tangval deuhte unaupa bang in;

²pitek deuhte nu bang in; nungak deuhte siangthoutakin sanggamnu bang in thuhilh in.

³Meithai, meithai taktakte zahtak in.

⁴Himahleh meithai kuapeuh in tate leh tute a neih uh leh, huaite’n amau inn sung ah Pathian limsakna mohpuakna thei masa uhenla, amau nu leh pate uh kem uhen; huai Pathian kipahlamtak ahi.

⁵Meithai taktak amah kia a om in Pathian tung ah lametna a nei a, sun leh zana ngen in a thum gige hi.

⁶Himahleh meithai amah nopna lel a kipia zaw, a damlai nangawn in a si ahi.

⁷Gensiatbeia a omtheihna ding un huaite thupiak in pia in.

⁸Himahleh kuapeuh in amah mite ading a ngaihtuah sakkei a, a ma inkuante kholhouh a ngaihtuahsak kei leh, ginna a zuausana, gingloumi sang in a gilou zaw hi.

⁹Meithai kum sawmguk chiang nuailam hilou, mi khat zi hisa,

¹⁰Thil hoih hihlama mi phatlohta a tate vaktei khina, mikhualte na zintun khina, misiangthoute khe na silta a, mangbangte na dawnzang khina, thil hoih peuhmah thanuamtak a na hihkhin ahihleh meithai a gelh theih ahi.

¹¹Himahleh meithai naupang simte zaw gelh ken; Khrist lam a a hong kiplouh un pasal neih a ut nak uhi.

¹²A ginna masa uh a topsan ziak un siamlouh tang in a om uhi.

¹³Huailou leng thadah in inn teng ah a banpawt nak uhi. Thadah kia leng hilou in, thu genlouh ding gen in, kamtam leh mite thilhih lai a vaihawmsak nak uhi.

¹⁴Huchi in meithai naupang simte zaw pasal nei in, tate nei uhenla, inn sung khosak ngaihtuah le uh, melmapa gensiatna ding lemtang musak kei le uh ka deih hi.

¹⁵Meithai khenkhat setan lam naih in a pialkheta uhi.

¹⁶Gingtami numei hiam pasal hiam in methaite neita leh dawnzang hen; saptuamte hihbuai in omkei hen; meithai taktakte a dawnzang theihna ding un.

¹⁷Saptuam Upa vaihawm hoihte, abikin Thugin leh Thu a semgimte a lehnih a hihthupi tuak a seh nawnsem hi uhen.

¹⁸Laisiangthou in, “Bawngtal in buh a chil lai in a muk gak ken,” a chi hi. “Nasemmi loh mutak ahi” a chi nawn hi.

¹⁹Saptuam Upa hekna zaw theihpih nih hiam thum hiam kam a louzaw sang ken.

²⁰Mikhialte mi tengteng ma ah taihilh in, midangte’n leng a lau theihna ding un.

²¹Deihsaktuam leh khentuam nei a bangmah hihlou a hiai thute zui ding in Pathian leh Khrist Jesu leh angel teltuamte mitmuh in phatuamngaitak in k’on theisak hi.

²²Kuamah tung ah khutnga pah kenla, midang khelhna ah leng kikum ken; ki hihsiangthou gige in.

²³Tui kia dawn kenla, na gilpi ziak in leh na hatlouh nak ziak in uain neu khakha zang zel in.

²⁴Mi khenkhatte khelhna a lang gige a, vaihawmna a tun nak hi; mi khenkhat khelhnate bel a khonungin a hong kilang hi.

²⁵Huchi mah bang in mi khenkhatte thil hoih hih kilang pah a om a, a kilang loute leng seltheih ahi kei hi.