Read Paite Chin 1 TIMOTHI 6 Bible Online

1 TIMOTHI 6 - Paite Chin bible

1 TIMOTHI 6

¹Pathian min leh a thuhilhna thu gensiat a a omlouhna ding in sikha hakkol bat peuhmah te’n amau pute bangkim ah zahtak tham in sim uhen.

²Huan gingta mi pu a neite’n unau a hih ziak un ngaineu kei uhen, himahleh phattuamna mute leh deihtakte a hih ziak un a na uh sepsak semsem uhen. Huai thute hilh inla, hanthawn in.

³Mi kuapeuh in thuhilhna dang a hilh a, thutak, I Toupa Jesu Khrist thu, leh Pathian limsak lam thuhilhna hoih a sakkei leh,

⁴Amah kisathei ahi, bangmah theilou ahi, theih naksang in kisel leh thukalh lam ah a hai zawta a, huchibang a kipan in, enna, kilaina, gensiatna,

⁵hoihlou lam a ginna, selhatna a suak nak hi; huchibang selhat mite lungsim sia nei leh thutak neilou mi, Pathian limsak pen punna khattou sa mi ahi uhi.

⁶Lungkimna toh kithuah Pathian limsakna punna thupitak ahi.

⁷Khovel ah bangmah i lutpih kei a, bangmah i pawtpih thei sam kei ding hi.

⁸Himahleh nekding leh silhding nei in, huaite ah i lungkim ding uhi.

⁹Himahleh, hauhsak tumte khemna, thang, haihuai leh hihsethei duhgawlna tampi ah a puklut nak uhi, huaite’n tuh siatna leh manthatna ah mite a hihtum nak uhi.

¹⁰Dangka sum deihtak zaw gilou chiteng bul ahi; khenkhatte’n a eng ua, ginna a paimangsan ua, amau leh amau lungkhamna tampi in a ki sunlet tektok uhi.

¹¹Himahleh nang Pathian mipa aw, huai thilte taisan inla, diktatna, Pathian limsakna, ginna, itna, thuaktheihna, kingaihniamnate delh in.

¹²Ginna kidouna hoih sual inla, tangtawn hinna len chinten in; huai tang ding a sap na hi hi; theihpih tamtakte mitmuh in gupna hoih na gumta hi.

¹³Pathian thilbangkim hihhingpa leh Khrist Jesu, Pontia Pilat mai a gupna hoih gumpa mitmuh in thu ka honpia hi.

¹⁴Toupa Jesu Khrist hong kilatnawn masiah huai thupiak siangthou leh gensiatbeia kem ding in.

¹⁵Huai kilakna amah huntak ah phattuak thuneipa tak kia, kumpipate Kumpipa, toupate Toupa’n a lak ding ahi.

¹⁶Amah kia in sihtheihlouhna a nei a, vak naihtheih vuallouh ah a om a, amah kuamah in a mu ngeikei ua, muh leng a mu thei sam kei uhi; amah kiang ah tangtawn in thupina leh thilhihtheihna om hen, Amen.

¹⁷Hiai khovel a mihausate kisatheilou ding leh sum muanhuailou a muanna ngalou a, thil tengteng kipahna ding a tampi a hon pepa Pathian a nga zaw ding in hilh in.

¹⁸Thil hoih a hih ding uh, thil hoih hih a a hauh ding uh, thilphala a siam ding uh ahi.

¹⁹Huchi a amau ading a gou kikhola, tunung a ding a suangphum hoih phuma, tangtawn hinna taktak a letkip theihna ding un.

²⁰Timothi aw, na kiang a kepsaka om kem hoih in; Pathian zahlouh thugen mawkmawk leh kikalhna dikloupi a pilna kichite nungngatsan in:

²¹Mi khenkhat in huai nei kichi in ginna ah a paikhial uhi. Hehpihna na kiang ah om hen, Amen.