Read Paite Chin 2 TIMOTHI 1 Bible Online

2 TIMOTHI 1 - Paite Chin bible

2 TIMOTHI 1

¹Paul, Khrist Jesu a hinna om chiamna thugenna dungzui a, Pathian deihdana Khrist Jesu sawltak in,

²Ka tapa deihtak Timothi kiang ah: Pathian leh Khrist Jesu a i Toupa kiang a kipan hehpihna, zahngaihna, lemna om hen.

³Sun leh zan khawllou a ka thumnate a nang hon theigige in, ka pi ka pu a kipan a sialehpha theihna siangtak nei a a na ka sep gige pa, Pathian kiang ah kipah thu ka hilh hi.

⁴Kipak a ka dim theihna ding in honmuh ka ut mahmah hi, na khitui theigige in.

⁵Ginna taktak nangmah a om ka theigige a, huai ginna a tung in napi Loisi ah a om a, na nu Iunisi ah leng a om a, huan nangmah ah leng a om chih diktak in ka thei hi.

⁶Huaiziak in ka khut ngak ziak a Pathian thilthawnpiak nangmah a om pen mutkuang ding in k’on theisak ahi;

⁷Pathian in launa kha a honpe kei a, thilhihtheihna leh itna leh kithuzohna tak neihna a honpe zaw hi.

⁸Huchi in i Toupa thu theihsak zumpih kenla, kei a hentapa leng hon zumpih sam ken. Tanchinhoih ziak a gimthuak Pathian thilhihtheihna dungzuiin hon thuakpih zaw in.

⁹Aman i thilhihte bang hilou in, amah seh leh a ma hehpihna bang zaw in hon hondama, sapna siangthou in a honsam hi; huai hehpihna leilung pianma a Khrist Jesu a honpiak ahita hi.

¹⁰Himahleh i Hondampa Khrist Jesu kilakna ziak in tuin hihlat in a omta hi. Aman sihna hihmang in, Tanchinhoih in hinna leh manthat theihlouhna a hihlangta hi.

¹¹Huai Tanchinhoih theisak ding a tangkoupihpa, sawltak leh sinsaktu a seh ka hi.

¹²Hiai ziak in ahi hiai thilte leng ka na thuak. Himahleh ka zum kei; ka ginpa ka thei a, a kiang a ka kepsak huaini ading in a kemhoih thei chih diktak in ka thei hi.

¹³Khrist Jesu a om ginna leh itna nei in, thudikte ka kam a nazakte zui tinten in.

¹⁴I sung a om Kha Siangthou hon kepsak thutak kem hoih in.

¹⁵Asia gam a om tengteng te’n a hon nungngatsan uh chih na thei a; a lak ua Phigella leh Harmojini a pang uhi.

¹⁶Toupa’n Onesifora inkuanpihte kiang ah zahngaihna pia hen aw, aman a hon hihhalh zelzel hi. Ka khainiang but leng a hon zumpih kei hi;

¹⁷Rome khua a a omlai in hon limzon a, a hon mukhia hi.

¹⁸Huai ni chiang in Toupa kiang a zahngaihna mu ding in Toupa’n amah sep hen. Ephesa khua a a nasep thupidan na thei hi.