Read Paite Chin 2 TIMOTHI 2 Bible Online

2 TIMOTHI 2 - Paite Chin bible

2 TIMOTHI 2

¹Huchi in nang ka tapa, Khrist Jesu a hehpihna om ah thilhihtheihna nei in om in.

²Theihpih tampite lak a ka kam a thu nazakte, mi muanhuai, midangte hilhsawn theidingte kiang ah kemsak in.

³Khrist Jesu sepaih hoih bang in gimthuak hon thuakpih in.

⁴Sepaih a om ding a a telpa kipahsak theihna ding in, sepaih kuamah kidou lai in hiai damsung khosaknate in a ki subuai ngeikei hi.

⁵Huan kidemnate ah mite pang mahleh dan bang a ahihkeileh khuksak in a om ngeikei hi.

⁶Louneipa semgim a gah tang masapa ahi ding hi.

⁷Ka thugentak ngaihtuah in; Toupa’n thil tengteng ah theihsiamna a honpe ding hi.

⁸Jesu Khrist, David suan, ka Tanchinhoih gen bang a misi lak a kipan a thounawnpa theigige in.

⁹Huai Tanchinhoih ziak in thil hihkhialpa bang in hen hial in gimna ka thuakzel hi; himahleh Pathian thu hen in a omkei hi.

¹⁰Huaiziak in Khrist Jesu a hotdamna tangtawn a thupina toh a muhsam theihna ding un, telte ziak in bangkim ka thuak gige hi.

¹¹Hiai thugen a dik hi: “A sihna a i sih khit ngal leh, a hinna ah i hing ding hi.

¹²I thuak leh a vaihawmna ah vai i hawm sam ding hi; Amah i kitheihmohbawl leh Aman leng hon kitheihmohbawl ding.

¹³Eite muanhuailou in om mah lehang, Amah zaw muanhuai in a om gige hi; Amah leh amah a kitheihmohbawl thei ngalkei hi.”

¹⁴Hiai theisak inla, thute leltak tung a a kisel louhna ding un Toupa muh in phatuamngaitak in theisak in; huai kiselna bangmah a phatuam kei a, a ngaikhete ading in siatna ahizaw hi.

¹⁵Nasemtu, zumna ding neilou, thutak thu diktak a zang, Pathian pomtak hi ding a nangmah kipe ding in theihtawpsuah in kisin in.

¹⁶Himahleh Pathian zahlouh thugen mawkmawkte nungngatsan in; huchibang mite Pathian limsaklouhna lam ah a pai gamla semsem ding ua,

¹⁷a thu un meima sia nek bang in a nezel ding; a lak uah Himenaia leh Phileta a pang uhi.

¹⁸Huai mite’n thohnawnna a omkhinta chi in, thutak lam a pialsan ua, mikhenkhatte ginna a hih mangsak uhi.

¹⁹Himahleh Pathian suangphum kip a dinglai a, hiai chiamtehna a nei hi: “Toupa’n amah a te a thei” chih leh “Toupa min lou peuhmah in diktatlouhna paisan hen,” chih.

²⁰Himahleh inn thupi ah tuium-belsuan dangkaeng leh dangka a bawlte kia a omkei a, sing leh bellei a bawlte leng a om hi; khenkhatte manphataka zat a om a, khenkhatte manphalou deuh a zat leng a omsam hi.

²¹Huaiziak in mi huai thilgiloute lak a a kihep leh, tuium-belsuan manphataka zat ding, siangthou, Toupa inn a zattak, nasep hoih chiteng dia mansa, ahi ding hi.

²²Himahleh valnou duhgawlnate taisan inla, lungtang siangthou a Toupa lou peuhmahte lak a diktatna, ginna, itna, leh lametna delh in.

²³Himahleh kidounate a suaksak nak chih thei in, kiselna haihuai leh pillou ah pang nuam ken.

²⁴Toupa sikha in a dou ding a hi kei a, mi tengteng tung a siamtum in, thuhilh siam in, gitlouh tung a thuakzou in,

²⁵Amah doute thunuailut tak in a thuhilh zaw ding hi. Huchi in Pathian in thutak a theihna ding un a kisiksak zenzen kha ding hi,

²⁶Huchi in khua a hon theithei ding ua, amaute suak leh sal a man a a utut a bawlpa Diabol thang a kipan a suakta thei ding uh.