Read Paite Chin 2 TIMOTHI 3 Bible Online

2 TIMOTHI 3 - Paite Chin bible

2 TIMOTHI 3

¹Huan hiai thei in, ni nanung ah hun haksa pipi a hongom ding hi.

²Mi amau ki-itte, dangka deihtate, kiuangsakte, kisatheite, Pathian gensete, nu leh pa thu mangloute, kipahna dan theiloute, siangthouloute,

³itna pianpih neiloute, buaina bawlte, hekte, kidektheiloute, mi huhamte, hoih deih hetloute,

⁴zuautatte, kingaisang, thunung khualloute, Pathian itsang a amau kipahna kia itzawte a hi ding uhi;

⁵Pathian limsak batna a nei ding ua, himahleh a thilhihtheihna a taksang kei ding uhi; tuabangte nungngatsan in.

⁶Huchibangte lak a mite inn peuh a lut a gitlouh gikpua numei haideuhte sal a manman te ahi uhi, huchibang numeite duhgawlna chichih a pimang in,

⁷zilzil napi a, thutak theipha ngeiloute ahi uhi.

⁸Janni leh Jambri in Mosi a dou bang un, huai mite’n leng thutak a dou gige uhi; lungsim sesa ginna lam a Pathian deihlouh mi ahi uhi.

⁹Himahleh huai val a hih kei ding uhi, a haidan uh Janni leh Jambri haidan a hong kitheih mah bang in miteng teng kiang a hong kilang ding hi.

¹⁰Himahleh nang zaw ka thugin, ka omdan, ka thiltup, ka ginna, ka thuakzohna, ka itna, ka kuhkalna na thei vek hi.

¹¹A hon sawina uh, hon gimbawlna uh na thei mahmah hi; Antiok khua, Ikoniam khua, Listra khua a ka tung a thiltung leh sawina ka thuakte; huai tengteng ah Toupa’n hon honkheta hi.

¹²Ahi, kuapeuh Khrist Jesu Pathian limsaka om tum photphot in sawina a thuak sam ding uhi.

¹³Migilou leh mi khemhatte mi khem leh khem a om in a gilou semsem ding uhi.

¹⁴Himahleh nang zaw na zilsa leh kiptak a na gintaksa thutak ah om gige in, kua a kipan na zil hiam chih theigige in.

¹⁵Huan Khrist Jesu ginna ziak a Hotdamna mu ding a nang hon hilhpilthei Laisiangthoute naupang nou a kipan theikhin na hi chih theigige in.

¹⁶Laisiangthou peuhmah Pathian hatkhum a piak ahi a; huaiziak in thuhilhna ding, taihilhna ding, bawlhoihna ding, diktatna lam a kichilna ding in a phatuam hi.

¹⁷Huchi a Pathian mi na hoih chiteng semding a kimtak a kivan a a kim theihna ding in.