Read Paite Chin 2 TIMOTHI 4 Bible Online

2 TIMOTHI 4 - Paite Chin bible

2 TIMOTHI 4

¹Pathian muh leh mihing leh misite ngaihtuah dingpa Khrist Jesu muh in, a kilakna leh a lalgam lou in, phatuamngaitak in k’on theisak hi;

²Thu gen in; a hun hi in a hunlou ah leng pangzel in; thuakzoutak a thuhilh kawm in a siamlouhdan uh theisak inla, taihilh inla, hanthawn in,

³Thuhilhna dik a ngaihkhiak ngaplouh hun uh hongtung ding hi; a bilte uh a zau ziak in amau deihlam bang in heutute a kiang uah a khawm ding uhi:

⁴A bilte uh thutak lam ah a ngongsak ding ua, tangthu lam naih in a pialta ding uhi.

⁵Nang zaw bangkim ah pilvang in, gimthuak inla, Tanchinhoih genna lam nna sem in na nasepna pen hih tangtung in.

⁶Kei zaw tuin leng luikhiak in ka om lellel a, ka pawt hun a tungta hi.

⁷Douna hoih ka dou khinta a, ki taitehna ka tai khinta, ginna ka lenkip paisuakta hi.

⁸Tun ah zaw diktatna lallukhu kei ading in koih in a omta, Toupa vaihawmpa diktat in huai ni chiang in kei a honpe ding, kei kiang kia hilou in a kilakna it peuhmahte kiang ah a pesam ding hi.

⁹Kintak in ka kiang ah hongpai teitei in; Dema in tulai khovel a it ziak in hon paisan a ,

¹⁰Thessalonika khua ah a paita hi; Kristen Galatia gam ah a paita hi, Titas Dalmatia gam ah a paita hi.

¹¹Luke kia ka kiang ah a om hi. Mark chial inla, honpi in, amah nasepna lam ah kei ading in a phatuam hi.

¹²Taikika zaw Ephesa khua ah ka sawlta hi.

¹³Na hongpai chiang in Troas khua a Karpa kiang a puanaktual ka nutsiat, laibute toh hontawi in, savun lai mahmah hontawi in.

¹⁴Alexander, dalsun siampa, ka tung ah a gilou mahmah hi.

¹⁵Toupa’n a thilhih bangzel in a thuk ding; amah lak ah nang leng pilvang in, i thu a dou mahmah hi.

¹⁶Ka siamnathu ka gen masakpen in kuama’n a hon panpih kei ua, a hon zuausan vek uhi; a mawh pua in om tuankei uhen.

¹⁷Tanchinhoih keimah ziak a hilhkim a a om theihna ding leh, Jentelte’n a zak theihna ding un, Toupa’n hon gum a a honhih hatzawta hi; Humpinelkai kam a kipan in suahtaksak in ka omta hi.

¹⁸Toupa’n gitlouhna tengteng lak a kipan in a hon suaktasak dia, a van gam a bittak in a hontun ding; Amah kiang ah tangtawn a thupina om hen. Amen.

¹⁹Priscilla leh Akuila, Onesifora inkuanpihte toh, chibai hon buksak in.

²⁰Erasta Korinth khua ah a om gige a, Trophimas bel Melita khua ah damlou in ka nusia hi.

²¹Phalbi ma in hongpai teitei in, Iubalate, Pudente, Lina te, Khlodia te leh unau tengteng in chibai a honbuk uhi.

²²Toupa Jesu Khrist na kha kiang ah om hen. Hehpihna na kiang ah om hen. Amen.