Read Paite Chin TITAS 1 Bible Online

TITAS 1 - Paite Chin bible

TITAS 1

¹Paul, Pathian sikha leh Jesu Khrist sawltak, Pathian mitelte, a ginna uh lamtou ding leh Pathian limsakna toh kithuah thutak theisak ding a sem in;

²huai tangtawn hinna lametna a kinga, Pathian zuaugen theilou in khovel omma a a chiam ahi.

³Himahleh amah huntak ah thugenna zang in a thu a hihlangta, huai thugenna Pathian i Hondampa thupiak bangzel a kepsak ka hi.

⁴Titas, ginna kibang a keimah tapa kiang ah: Pathian leh Khrist Jesu i Hondampa kiang a kipan hehpihna, zahngaihna leh lemna om hen.

⁵Hiaiziakin ahi huai Kret tuikulha nang k’on nutsiat, thilhih zohlouhte na hihzoh theihna ding leh thu k’on piak bang a, khua teng a upate na seh theihna ding in.

⁶Upa ding gensiatbei, Zi khat nei, tate Pathian gingta, nawpsak bawlluatna lamsanga gensiat lawhlou, dan banglou a omlou, nei a hih peuhmah uleh,

⁷Saptuam heutu Pathian sumkempa a hih ziak in gensiatbei a hih ding ahi; migenhak, lunggam, uain khamhat, mivuak hat, punna nina huaiham mi hi ding hilou ahi.

⁸Mi kipahpih dan siam, hoihlam deih, lungsim diktak, midiktat, misiangthou, kidekthei mi hizaw ding ahi.

⁹A sinsa thuhilhna dik midang sinsakthei leh selhatmite siamlouh tangsak thei ding a sinsaka om thugin muanhuai lenkip mi ahi ding hi.

¹⁰Dan banglou a om, thu mawk gengen leh mikhem ching mi tampi, a bikin zeksumte lak a mi a om uhi.

¹¹Huai mite kam humsak ding ahi, punna nin deih ziak a thuhilhlouh ding hilh in, mite a inkuan kuan un a pisia uhi.

¹²Amau lak a mi a zawlnei khat in houh, “Kret tuikulh a mite zuautheite, gamsa giloute, thadah, anhaite ahi uh” a chi hi.

¹³Hiai theihpihna a dik ahi. Huaiziak in ginna a a dik theihna ding un leh,

¹⁴Judate tangthu phuahtawmte a kisubuailou ding leh thutak nungngatsan nakte thupiak a limsaklouhna ding un naktakin taihilh in.

¹⁵Misiangthoute ading in bangkim a siangthou hi; himahleh mi nin leh gingloute ading in siangthou a omkei hi, a lungsim uh a sialehpha theihna uh leng a nin hi.

¹⁶Pathian thei a kichi ua, himahleh a thilhih un a nawlkhin nak uhi, kihhuaite, thumangloute, thil hoih sepding peuhmah a Pathian deihlouhte ahi uhi.