Read Paite Chin TITAS 2 Bible Online

TITAS 2 - Paite Chin bible

TITAS 2

¹Nang zaw thuhilhna hoih toh kituak thugen in.

²Putekte kidekthei, zahtakhuai, lungsim hoihtak, ginna leh itna leh kuhkalna a diktak hi ding in hanthawn in.

³Pitekte leng huchibang in, siangthouna toh kimeh, khohei a zahdan siam ding leh heh hatlou, uain hailou, thilhoihte zilsakte hizaw ding in hanthawn in.

⁴Nungak deuhte tuh a pasalte uh leh a tate uh it ding leh lungsim hoihtak pu a om ding a a hilhtheihna ding un,

⁵Pathian thu gensiat a a omlouhna ding in theisiamtak a kithununthei, beven lou, amau inn sung kem hiathiat, chingkam leh a pasalte thuthu a om ding a a thuhilh theihna ding in.

⁶Huai bang in, tangvalte lungsim hoihtak pu ding in thuhilh in.

⁷Thil bangkim a thil hoih hihlama etton ding in kibawl inla: na thugin sinsakna ah diktatna, chihtakna leh,

⁸Gensiat vuallouh paukamte langsak lechin a leh lam a nang hondemte’n nang tungtang thu a thusia gen ding neilou a a zum theihna ding un.

⁹Sikhate, a pute uh sellou a thuthu a om ding leh bangkim a a kipahna ding ua om ding in thuhilh in.

¹⁰Pathian i hondampa thuhilhna thu bangkim a a kilawmsak theihna ding un, khut them neilou ding, muanhuai a na hoih tengteng hihlang zaw ding in sinsak in.

¹¹Mitengteng kiang ah hotdamna hontun in i Pathian hehpihna a hongtungta hi.

¹²Pathian limsaklouhna leh khovel duhgawlna tawpsan in, tulai khovel ah kidek leh diktattak leh Pathian limsak in i om ding uh chih theisak in.

¹³Lametna kipahhuai, i Pathian thupi leh Hondampa Jesu Khrist thupina kilakna ngak in.

¹⁴Aman tatlekna tengteng lak a kipan in a hontat theihna ding in leh chitel tuam, thil hoih hih a phatuamngai, amah ading a a hih siangthou theihna ding in i sik in a kipeta hi.

¹⁵Thuneitakin huai thute hilh inla, hanthawn inla, taihilh in. Kuamah in nang hon musit kei uhen.