Read Paite Chin HEBRUTE 1 Bible Online

HEBRUTE 1 - Paite Chin bible

HEBRUTE 1

¹Pathian, nidanglai a pi leh pute kiang a seh tampi leh lam chiteng a zawlneite zang a thu na gen pa’n,

²Tu hun nanung ah eite kiang ah a Tapa in thu a hon genta hi. Huai mi bangkim gouluahpa ding in a siam a, huai mi mah in khovel a siam hi.

³Amah ah a thupina vak leh a tak batpih leh, amah thilhihtheihna a bangkim tungdingpa hi in, i khelhnate sianna a bawlkhit nung in tunglam a thupipen taklam ah a va tuta hi.

⁴Angelte sang a min ngaihzaw a muh bang in amau sang a thupizaw a na hi him hi.

⁵Angelte lak ah kua kiang ah hiai thute a gen ngei a? “Nang zaw ka Tapa na hi a, tuni in k’on neikhia” chih leh “Amah ding in Pa ka hidia, amah kei ding in Tapa ahi ding”

⁶Huan a ta neihsun khovel a a pilut lai in, “Pathian angelte tengteng in leng amah chibai buk uhen,” a chi hi.

⁷Huan angelte tungtang thu ah, Aman zaw a angelte huih in a suaksak a, a nasemte leng meikuang in a suaksak chi in a gen hi.

⁸Tapa tungthu ah bel: “Pathian aw, na mangtutphah tangtawn in a om ding hi; dikna kumpi chiang leng na gam kumpi chiang ahi chi in a gen hi.

⁹Diktatna na it a, tatlekna na hua a; huaiziak in Pathian, na Pathian in na lawmte sang in nang kipahna thau a hon nak nilh hi.”

¹⁰Huan nang, “Toupa, a tung in leilung kingakna na phumkhin a, Van leng na khutsuak ahi;

¹¹Huaite a hong mangthang ding ua, nang bel om tawntung ding na hi; huaite tengteng puansilh bang in a honglui ding ua,

¹²Puan bang in na zial ding a, puansilh banglel in a hong lamdang ta dia; nang bel a ngeingei na hiden a, na kumte leng a mang kei ding hi,” chi in.

¹³Himahleh Angelte tungthu ah hiai a a gen ngei hia? “Na melmate na khepek ngakna a ka bawl masiah ka taklam ah tu in chih”

¹⁴Angelte tengteng nasepna khate, hotdamna gouluah dingte adia nasem ding a sawlkhiak ahi kei ua hia?