Read Paite Chin HEBRUTE 10 Bible Online

HEBRUTE 10 - Paite Chin bible

HEBRUTE 10

¹Dan bel thil hoih hongom ding lim kia ahihziakin, a taktak lohkhiakna neilou in, kumtenga kithoihna ngeingei a latzelte un, a be ding a hongpaite bangchi mah in a bukimsak thei ngeikei hi.

²Huchi kei leh lat tawp thamta lou ding uhia? A bemite khatveia hihsiangthou pah hileh khelhna kitheihna a nei nawn kei ding uhi.

³Himahleh huai kithoihna ah kumteng in khelhnate theihnawnna a hongom nak hi.

⁴Bawngpa leh kelte sisan in khelhnate lamang theivual ahi kei hi.

⁵Huchi in khovel a a honglut lai in: “Kithoihna leh thillat na deihkei a, kei ding in pumpi n’on bawlsak zaw hi:”

⁶“Halmanga pumpiaknate leh khelhna ding a kithoihnate ah kipahna himhim na neikei hi.

⁷Huaitak in ken “Pathian aw, Ngai in, Laibuziala ka tungthu gelh ahihbangin na deihlam hih di’n ka hongpai” ka chi hi,

⁸A tung ah “Kithoihnate, thillatte, haltum pumpiaknate, khelhna ding a kithoihnate danbanga lat ahihziakin na deihkei a, amaute ah kipahna na neisam kei” a chi hi,

⁹Huaitak in aman “Ngai in, Pathian aw, na deihlam hih ding in ka hongpai” a chita hi. A nihna a tunding theihna ding in a masapen a lamangta hi.

¹⁰Huai deihlam in Jesu Khrist pumpi khatvei thu a latpah ziak in, hihsiangthou in i omta hi.

¹¹Huan siampu tengteng in kawla nisuak sim a nasem in, khelhnate bangchik maha hihmang theilou kithoihna ngeingei lan gige in ading uhi.

¹²Amah bel tangtawn a ding a khelhnate adia kithoihna khat kia a lat nung in, “Pathian taklam ah a vatu zawta hi.”

¹³Huai nungsiah “A melmate a khepek ngakna a siam a hih masiah uh a ngak nilouh hi.”

¹⁴Huchi in khatvei thillat in hih siangthousate tangtawn a ding in hih bukimta hi.

¹⁵Huan Kha Siangthou in eite a hon theihpih sam a, amasa in hiai bang in a gen hi:

¹⁶“Huai nite khit chiang in a kiang ua ka thukhun ding hiaite ahi, Toupa’n a chi: A lungtang uah ka thupiakte ka koih dia, a lungsim uah ka gelh nalai ding chi a a gen khit in,

¹⁷A khelhnate uh leh a tatleknate uh ka theigige nawn takei ding,” a chi hi.

¹⁸Huchi in khelhna ngaihdam a hihnung in khelhna ading in thillat a om nawnta kei hi.

¹⁹Huchi in unaute aw, Jesu sisan ziak a Mun Siangthou a lutngamna nei in,

²⁰Lam a hon bawlsak, lam thak leh hing tawn a puanzak sung a luttheihna amah pumpi tawnin i nei uhi.

²¹Pathian inkuante tung a siampu thupitak i neih ziak in,

²²I lungtang a sialehpha theihna sianglou thehsiansaka om a, i pumpi leng tuichima sil a om in, ginna a theihchetna kim nei in lungtang takmah pu in amah i naih ding uhi.

²³I lamet thugin linglou in i pomkip ding uh, thuchiampa a muanhuai hi.

²⁴Huan itna leh thil hoih hih a kitokthou ding in i kingaihtuah ding uhi.

²⁵Khenkhatte hihdan bang a i kikhopnate uh tawpsanlou in, kihanthawn chiatni; ni hongnai hulhul a na theih un kihanthawn tuah sem un.

²⁶Thutak theihna kim i tan nung a thil i hihkhelh teitei in zaw, khelhnate adia kithoihna a om taklouh ziak in,

²⁷Vaihawmna lauhuai mulkimhuaitak, doumite kangmang ding thangpaihna mei maban a nei in i om zawta ding hi.

²⁸Mosi danthu khawksalou mi “Theihpihtu mi nih hiam thum hiam nuai ah” lainat bei in a si zel uhi.

²⁹Pathian Tapa sikdena, thukhun sisan amah hih siangthouna pen thil namai a bawl a, hehpihna Kha hihvuimi, huai mi sang a bangchipheta gawtna thupizaw thuaktakin nasep uhiam?

³⁰“Phulakna himhim keimah lak ding ahi, keiman ka thuk ding chih leh Toupa’n a mite a vaihawmsak ding” chi nawnpa lah i thei ngal uhi.

³¹Pathian hing khut a puk thil mulkimhuaitak ahi.

³²Himahleh tuma lam a hihvak a na om nung ua thuakna buaina thupitak na thuaklai nite uh thei nawn un;

³³Kongkhat ah zaw muhsit leh haksatna thuak in etnop a bawl in na om ua, kongkhat ah lah huchibanga bawl a omte thuakpihte na honghi uhi.

³⁴Kolbunte na lainat ua, gou hoihzaw leh omden ding noumau in na neih uh kithei in na van hon laksakte uh leng kipaktak in nana thuakzou behlap uhi.

³⁵Huchi in kipahman piak thupitak ngahna ding na ginna uh paimang kei un.

³⁶Pathian deihlam na hihnung un thilchiam na muhtheihna ding un kuhkalna na kiphamoh uhi.

³⁷Sawtlou nungchiang a hongpai dingpa, hongpai ding ahi, sawt a halta kei ding hi.

³⁸“Tuin ka mi diktat tuh ginna in a hing ding; a nungtolh leh bel ka kha in amah ah kipahna a neikei ding” chih ahi ngal a.

³⁹Himahleh eite zaw mangthang ding a nungtolh pawl a pang i hi kei ua; hinna humbit ding a ginna nei pawl a pang i hi zaw uhi.