Read Paite Chin HEBRUTE 11 Bible Online

HEBRUTE 11 - Paite Chin bible

HEBRUTE 11

¹Ginna tuh thil lamette omngei a theihtelna leh thil muhlouhte theihchetna ahi.

²Huai ah nidanglai upate’n phat a loh uhi.

³Ginna in khovelte Pathian thu a suktuah ahita chih i thei ua, huchi in thil muhtheihte leng thil langtheite a siam ahi kei hi.

⁴Ginna in Abel in Kaina sang in kithoihna hoihzaw Pathian kiang ah a lan a, huaiziak in midik hihna a mu chih Pathian in a thilpiakte a pomna ah a theisak hi; huai ginna ziak mah in aman sih nung nangawn in thu a genlai hi.

⁵Ginna in Enok leng sihna chiamlou ding a lakmang in a om a; Pathian in a lakmang ziak in muhtheih ahita kei a; lakmang a a omma in Pathian pahtak lammi ahi chih theihsakna a mukhinta hi.

⁶Himahleh ginna lou in amah pahtak lammi hihvual ahi kei; Pathian kiang a hongpai in, amah a om chih leh a zongmite lohchingsakpa ahi chih gin ding ahi.

⁷Ginna in Noah thil muh nailouhte lamthu ah Pathian hilh a om in, Pathian laudan siam in a inkuan hotdamna ding in long a bawl a; huai in khovel siamlouh a tangsakta hi, ginna ziak a diktatna gouluahpa ahita hi.

⁸Ginna in Abraham sapa a omlai in a gouluah ding mun a lut ding in paikhiakna ding thu a muta hi; a paina ding lam theilou in a paikheta hi.

⁹Ginna in gamchiam ah mi gam a tam bang in a na tam nilouh a, thuchiam kikhat gouluahpih ding Isak leh Jacobte toh puanin ah a om uhi.

¹⁰Khopi suangphum nei, Pathian gel leh lam a ngak nilouh hi.

¹¹Ginna in Sarah ngei in leng a chiampa muanhuai a sak ziak in, a teknung in chi paitheihna a mu hi.

¹²Huchi in pasal khat amah lah misi bang mai, a kipan “Van a aksite bang a tam, tuipiau a piaunel bang a sim zohlouh suangtu” a hongsuakta uhi.

¹³Hiai mi tengtengte’n thilchiamte tangkhin hilou in, himahleh huaite gamlapi a galmuh a na kipahpih hizaw in, lei ah zaw khualzin leh mikhual lel ahi uh chih kithei gige in ginna nei in amaute a sita uhi.

¹⁴Huchibang a thu na gente’n amau gam ding a zong uh chih a hihlang mahmah uhi.

¹⁵A pawtsan gam uh lunggulh hile uh bel kiknawnna hunlem mu mahmah ding ahi uhi.

¹⁶Himahleh tu’n bel gam hoihzaw huai van a ompen deih ahi ua; huchi in Pathian a Pathian uh chih a om a zumkei a; amau ding in khopi khat a bawlsak hi.

¹⁷Ginna in Abraham tuh ze-et a om in, Isak a lan a; huan thuchiamte kipaktak a sangpan a tapa neihsun a lan hi,

¹⁸Huai lah “Isak ah na suante a ki minloh ding” a chih pen ahi.

¹⁹Pathian in misi lak a kipan nangawn kaithou thei in a sep a; huchi in gentehna dan a gen in amah misi lak a kipan mu nawn ahi ngei hi.

²⁰Ginna in Isak in thil hongtung dingte thu ah Jakob leh Esau a vualzawl hi.

²¹Ginna in Jakob in, a sih ding kuan in Joseph tate a vualzawl tuaktuaka, “A chiangkhun dawna kingai in Pathian a bia hi.”

²²Ginna in Joseph in, a sih ding kuan in, Israel suante pawt ding thu a gen a; a guhte vui ding tungtang thu a pia hi.

²³Ginna in Mosi a pianlai in, naungek melhoih tak ahi a chih ziak un kha thum sung a nu leh a pa sel in a om a; kumpipa thupiak leng a lau kei uhi.

²⁴Ginna in Mosi in a hong pichin nung in Pharo tanu tapa a kiloh a utkei a;

²⁵Sawtlou kal a dia khelhna nopna kipahpih sang in Pathian mite toh sukgentheih thuak a tel zawta hi.

²⁶Khrist a muhsitna uh Aigupta gam goute sang a hauhsakna thupizaw in a ngai a; kipahman piakding a et zel ziak in.

²⁷Ginna in kumpipa thangpaihna laulou in Aigupta gam a paisan a , muhtheihlouhpa a muh ziak in a thuak teitei hi.

²⁸Ginna in Paikan Ankuangluina leh sisan thehna a bawl a, ta masa hihmangthangpa’n amaute a khoihlouhna ding in.

²⁹Ginna in gamhul a pai bang in Tuipi San a kan ua; Aiguptate’n tua bang a hih a tumsam ua, valhzawh in a omta uhi.

³⁰Ginna in Jeriko khaw kulh ni sagih a um nung un a chimta hi.

³¹Ginna in Rahab kizuaknu gingloute lak ah a mangthang khawm kei, enkhete im neilou a a pahtak ziak in.

³²Huan bang ka gen nalai dia? Gideon thute, Barak thute, Samson, Jepthah, leh David thute, Samuel thute, zawlneite thute genni chile hang hun in hon daihlou ding ahi.

³³Huai mite’n ginna in gam a la ua, thudik a vaihawm a zong ua, thuchiamte a tang ua, humpinelkai kamte a chihsak uhi.

³⁴Mei thilhihtheihna a hihmit ua, namsau hiam nangawn a pel ua, hatlouhna a kipan hattaka bawl in a om ua, kidouna ah mihat minthang a na hi ua, namdang kidou pawlte a taikeksak uhi.

³⁵Numeite’n a misite uh thounawn a mu ua; khenkhatte gimthuak sak in a om ua, thohnawnna hoihzaw a tan theihna ding un khahkhiakna a deihkei uhi.

³⁶Midangte’n leng nuihza bawlna leh vuak a thuak ua, ahi, huailou leng, kolbut leh hentakna a tuak uhi;

³⁷Suang a den in a om ua, singatna a attan in a om ua, khemna a tuak ua, namsau a satlup in a om ua; belam vun leh kel vun silh in a vakvai ua; gentheitak a gimthuak a sawi in a om uhi,

³⁸Khovel amau tenna tak hilou mite, gamdai mun, mualtung, guam leh kolhawm ah a vialvak vak uhi.

³⁹Ahi a, hiaite tengteng in ginna ziak in phat na lawhkhin mahle uh thilchiam pen a tang kei uhi:

⁴⁰A ziakbel Pathian in ei a ding a thil hoihzaw muhkholh a neih ziak a, ei tellou a amaute hihbukim a a omlouhna ding ziak uh ahi.