Read Paite Chin HEBRUTE 12 Bible Online

HEBRUTE 12 - Paite Chin bible

HEBRUTE 12

¹Huaiziak in huchitel a theihpihte, meipi thupi umsuak a i om thei in, hon hihnok peuhmah leh khelhna eimah a belhte koihmang ni, huan i ma ua kitaitehna ding om ah kuhkaltak in tai ni.

²Jesu, i ginna siampa leh hihkippa, a ma a kipahna om ziak a zahlaknate ngaineu a Kros a thuakpa, Pathian mangtutphah taklam a tupa, Amah lam en in.

³Na khalam ua na bah ua, na lungkiak louhna ding un, mikhialte apan a huchibang a selkalhna thuakpa ngaihtuah un.

⁴Khelhna dou in sisan suak hial in na pang naikei uhi; hanthawnna thu, tate taihilh bang a nou hon taihilhna na mangngilhta uhi.

⁵“Ka ta, Toupa sawina ngaineu kenla, a taihilh a na om in leng lungke sam ken;

⁶Toupa’n a itte sawi nak a, ta a kipahpih a vaw nak hi,” chi in.

⁷Na thuak uzaw noumau ading ahi; tate tung a hihbang in Pathian in na tung uah a hih a; pa sawilouh ta kua a om ngei a?

⁸Ta chihna teng lawh a sawina lawhlou a na om un bel, ta tak hilou in, sawn na hi ua kei dia.

⁹Huailou leng eite honsawi ding, sa ah pate uh i nei uhi, huaite lah zahtak ngal hang a; huai sang a thupizaw in, i hinna ding in, khate Pa thuthu in i omkei ding ua hia?

¹⁰Amau zaw ni sawtlou chik, hoih a sak bangzel un a honsawi ua, aman bel a siangthouna i tan theihna ding in, i hoihna ding in a honsawi zaw hi.

¹¹Sawina himhim thuaklai in kipahhuai in a langkei a, khasiathuai in a lang hi, thuaknung in huchi a sawizawt a omte ding in gah khamuanhuaitak leh diktatnatak a suahsak zel hi.

¹²Huchi in khut kaikhete leh khut zawte liktou un;

¹³Huan khebai kilawi saklou a, hihdam a a om zawkna ding in, na khete uh ding in lamtang bawl un.

¹⁴Mitengteng toh kituahna leh siangthouna delh un, huai siangthouna lou in kuamah in Toupa a mu kei ding uhi:

¹⁵Pilvangtak in en un, huchilou in zaw Pathian hehpihna ngah zoulou kuahiam a om ding a, khatna zung banghiam hongsel a nou hon hihbuai in, huai in mi tampi hihnit in a om ding uhi;

¹⁶kingaihhat hiam, Esau bang a Pathian zahlou mi hiam a hongom kha ding hi. Aman a tamasa hihna an khatvei nek in khawngta hi.

¹⁷Huai nung in vualzawlna gouluah a ut in, khitui kekawm in phatuamngaitak in zong mahleh, kisikna hun a muhlouh ziak in paih in a omta chih na thei uhi.

¹⁸Nou zaw tang khoihtheih, mei a kangte, meivomte, mialte, huihpite,

¹⁹pengkul ginnate, thugen ging omnate tung na hi kei ua; huai ging zate’n thudang a kiang ua gen nawnlou ding in a ngen uhi.

²⁰“Gamsa nangawn in huai tang a khoih aleh suang a denlup in a om ding” ahi chih thupiakpen a thuak theikei uhi.

²¹A thil muh peuhmah uh a kihtakhuai mahmah ziak in Mosi in, “Ka lau a, ka nak lin mahmah” a chi hial hi.

²²Himahleh Zion tang, Pathian hing khua, vanlam Jerusalem, sim zohlouh angel hon khawmpite,

²³Tamasa van a min tuang saptuam hon kiang, Pathian, mitengteng ngaihtuah pa kiang bang, midiktat hih hoihkim kha kiang leh,

²⁴Jesu thukhun thak palai kiang, sisan theh, Abel sisan sang a thu hoihzaw genpa kiang tung na hi zaw uhi.

²⁵Thugenpa na deihkei kha ding uh, pilvang un. Lei amaute taihilh khawlpa a deihlouh ua bawn, gimthuakna a pelhlouh ngal un, eite, van a kipan a hon taihilhpa kiheisante’n i pelkei ding hi.

²⁶Huai hun in aw in lei a hihling a; “Himahleh tunzaw, khatvei lei kia hilou in, van leng ka hih ling nawn ding chi in a kichiam zawta hi.”

²⁷Khatvei ka hihling nawn ding chih in, thil lingloute a omden theihna ding in, thil lingtheite thilsiamte bang phet in, suanmang in a om ding chih theisakna ahi.

²⁸Huchi in hihlin vuallouh gam i tan ziak in, hehpihna i nei ding ua, huaiziak in zah leh laudansiam kawm in, Pathian pahtaklam na i sem thei ding uhi.

²⁹Pathian zaw mi katmang hat mei ahi.