Read Paite Chin HEBRUTE 13 Bible Online

HEBRUTE 13 - Paite Chin bible

HEBRUTE 13

¹Unau ki-itna om zel hen.

²Mikhualte tung ah itna suah ding mangngilh kei un; huchibang hih in khenkhat in theiloupi’n angelte a zintun uhi.

³Hen a omte hen hisam bang in theigige unla; gimthuakte sa a om samna hihziak un theigige un.

⁴Mi tengteng lak ah kitenna pahtawi in om henla, lupna leng hihbuah louh in om hen; kingaite leh angkawmte tung a Pathian in vaihawm ding ahi.

⁵Na lungsim putdan uh dangka deihtakna panglou hi hen; na thil neihsun tung uah lungkim un; amahmah in, “Bangchik mah in k’on donlou kei ding a, paileng k’on paisan kei ding” a chi hi.

⁶Huchi in hangsantak in, “Toupa hon panpihpa ahi, ka lau kei ding; mihing in bang a honchih thei dia?” i chi uhi.

⁷Nou hon heu, Pathian thu honhilhte, theigige unla, a omdan ua thilsuakte ngaihtuah in a omdan uh ching un.

⁸Jesu Khrist tuh zan, tuni, leh tangtawn in a ngeingei in a om gige hi.

⁹Kisinsakna tuamtuam leh thugin lamdangte mutleng in omkei un; lungtang hehpihna a hihkip a om a hoih ngal a, nekdingte bang a hihkip a omlou in; huchibang lam lungkhamte’n huaite ah phattuamna a mu tuankei uhi.

¹⁰Eite’n maitam khat, biakbuk nasemte’n a nek theihlouhna mun i nei hi.

¹¹Gan sisan, siampu lianpen in Mun Siangthou a khelhna adia lan a a lutpih zel luangte dainawl ah a hal uhi.

¹²Huchi in Jesu in leng amah sisan mahmah a mite a hih siangthouna ding in kulh kongkhak pawlam ah a na thuakta hi.

¹³Huchi in amah a muhsitna uh pu in dainawl ah a kiang lam ah i paikhe ding uhi.

¹⁴Hiailai ah zaw khomun kip i nei ngalkei ua, kho hongom ding i zong uh ahizaw hi.

¹⁵Huchi in amah vang in phatna kithoihna Pathian kiang ah i lan gige ding uh, a min gupna mukte gah a hih ziak in.

¹⁶Himahleh thil hihhoih leh thilphal mangngilh kei un; huaibang kithoihna tung ah Pathian a lungkim mahmah hi.

¹⁷Nou hon heutute thu mang unla, a thuthu un om un, a nasepte uh tanchin gennawn ding a, na khate uh ching a honveng ahi uhi, lungkham kawm hilou in, kipaktak in semsak un; huchilou in zaw nou ading a khawk ahizaw ding hi.

¹⁸Hon thumsak un; bangkim a diktattak a om a, sialehpha theihna siangtak nei ka hi uh chih diktak in ka kithei uhi.

¹⁹Huan kintak a na kiang ua sawlnawn a ka om theihna ding in, huai ding in k’on ngen nawn sem hi.

²⁰Tuin, lemna Pathian, tangtawn thukhun sisan ziak a misi lak a kipan a, i Toupa Jesu, Belamchingpa thupitak, kaithou nawn pa’n,

²¹A mitmuh a a kipahlam peuhmah Jesu Khrist ziak in eimah a sem in, a deihlam hih ding in thil hoih chiteng lam ah nou hon hihkim hen: Jesu Khrist kiang ah thupina tangtawn in om hen. Amen.

²²Himahleh unaute aw, k’on ngen hi, hanthawn thuhilhna ngaithei teitei un; na kiang uah thu tomchik ka gelh uhi.

²³I unaupa Timothi a pawtsakta uh chih na thei un; a hong paima deuh in, amah toh nou k’on mu ding hi.

²⁴Nou hon heute tengteng leh misiangthoute tengteng chibai hon buksak un. Italy gam a mite’n chibai a honbuk uhi.

²⁵Na vek ua kiang ah hehpihna om hen, Amen.