Read Paite Chin HEBRUTE 2 Bible Online

HEBRUTE 2 - Paite Chin bible

HEBRUTE 2

¹Huaiziak in bil a i zakte phatuamngai tak in i khawksa nawn sem ding uhi, huchilou in zaw i tolhmangsak kha zenzen ding uhi.

²Angelte zang a thugen nangawn a kip a, tatlekna leh thumanlouhna chiteng in thukna diktathuaitak a muhzel ngal un,

³Huchitel a hotdamna thupi ngeingaih keileng bangchi’n ahia i suahtak theih mahmah ding? Huai hotdamna thu a tung a Toupa zang a genkhit ahi a, a zate’n hon na hih kipsak uhi.

⁴Pathian in leng chiamtehnate leh thillamdangte leh thilhihtheihna chiteng toh, amah deih bangzel a Kha Siangthou thilhawmte toh, amaute a theihpih hi.

⁵Khovel hongom ding a tanchin i gen uh, angelte nuai ah a koih kei hi.

⁶Himahleh mi kuahiam in koilai hiam ah hiai thu gen in a theisak hi; “Mihing bang a tel a, na theihgige? Mihing tapa leng bang ahia, na vehnak?”

⁷“Amah angelte sang a nuai in na bawl a; thupina leh pahtawina na khusak a, na khutsuak tung ah heutu in na bawl hi;”

⁸A khe nuai ah bangkim na koih a, chi in. Huchi in bangkim a nuai a a koih ziak in a nuai a koihlouh bangmah a neikei hi. Himahleh tun ah zaw bangkim a nuai a om in i mu nai tadih kei uhi.

⁹Himahleh Jesu angelte sang a niamzaw deuh a a bawl takdih tuh, sihna thuak in thupina leh pahtawina khuksak a om in i mu zaw ahi, Pathian hehpihna ziak in sihna michih a chiamsak ding ahi.

¹⁰Amah a ding leh amah ziak a bangkim omsakpa’n tapa tampi thupina a pilut a, a thuakna ziak a amaute hotdamna makaipa bukim hih amah a dia kilawm him ahi.

¹¹Hihsiangthoupa leh hihsiangthoute avek un mi khat a pawt ahi uhi. Huaiziak in aman amaute unaute, chih a zum kei hi.

¹²“Ka unaute kiang ah na min ka gen dia; omkhawmte lak ah lasa in k’on phat ding” chi in.

¹³Huan, “Amah ah ka ginna ka nga dia, a chi nawn hi. Huan en dih ua kei leh Pathian honpiak tate” a chi nawn lai hi.

¹⁴Huchi in naupangte sa leh sisan tangte a hihchiat ziak un, amah ngei in huai bangmah a tangsam hi; a sihna a sihna thuneipa, Diabol, a hih manthat theihna ding leh,

¹⁵Sih kihtak ziak a damsung sikha a omte tengteng a suahtaksak theihna ding in.

¹⁶A awlmoh a, a panpih zelte angelte ahi kei ua, Abraham suante ahizaw uhi.

¹⁷Huchi in mite ading a khelhna thuphatawina bawlsak ding in, Pathian lam ah siampu lianpen, mi lainatthei leh muanhuaitak a hihtheihna ding in, bangkim a unaute bang a hongom amah adin a kiphamoh him ahi.

¹⁸Amah ngei in khemna tuak a a na thuaktak ziak in khemna tuakte a panpih thei ahi.