Read Paite Chin HEBRUTE 3 Bible Online

HEBRUTE 3 - Paite Chin bible

HEBRUTE 3

¹Huchi in unau siangthou, van sapna tangsamte aw, i thugin toh kisai a Sawltak leh siampu Lian, Jesu ngaihtuah un.

²Pathian inkuante tengteng lak ah Mosi a muanhuai mah bang in, amah a seppa lak ah a muanhuai hi.

³Inn sung a papen a inkuante sang a a pahtawi zawk bang un, amah Mosi sang a thupi zawk semna mu dia kilawm a seh ahita hi.

⁴Inkuan chih in papen kuahiam a neichiat ngal uhi; bangkim papen bel Pathian ahi.

⁵Huan huai nung a thugenlai dingte theihsakna ding in, Mosi Pathian inkuante tengteng lak a nasempa in zaw a muanhuai ngei hi.

⁶Khrist bel Pathian inkuante tung a Tapa in a muanhuai hi. A tawptan a i hangsanna leh i lametna suanna kiptak a i vomhoih phot leh a inkuante eite i hi uhi.

⁷Huchi in Kha Siangthou gen bang in, “Tuni a a aw na zak chiang un,

⁸Gamdai a ze-etna ni a a hel bang un, na lungtang uh khauhsak kei un;

⁹Huailai ah na pi leh pute un hon ze-et in a honkhem ua, kum sawmli sung a ka thilhihte a mu uhi;

¹⁰Huchi in huai suante tung ah ka lung hita kei a, ‘a lungtang un a ngaihtuah khial gige ua, ka lampite leng a theikei uhi,’ ka chi hi,

¹¹Ka thangpaihna a ka kichiam bang in ka khawlna ah a lut kei ding uh,” chi in.

¹²Unaute aw pilvang un, huchilou in zaw Pathian hing tawpsan ding in na lak uah kuapeuh sung ah ginlouhna lungtang gilou a hongom kha ding hi.

¹³“Tuni” a chih lai un niteng in ki hanthawn tuah zaw un, huchi a na lak ua mi kuamah khelhna khemhat ziak a hihkhauh a na omlouhna ding un,

¹⁴I ginna kipatna pen a tawptan a kiptak a i vomhoih phot leh, Khrist a tanneite i hita uhi.

¹⁵“Tuni in a aw na zak chiang un a hellai bang un, na lungtang uh khauhsak kei un,” a ki chih lai teng.

¹⁶Ahihleh kuate ahi ua theinapi a helte? Aigupta a kipan a Mosi pipawt tengteng hilou uhia?

¹⁷Kuate tung ah ahia, kum sawmli sung a lunghihlouh? Hihkhialte a luang uh gamdai a pukmangte tung ah hilou hia?

¹⁸Thumangloute kiang ah kia loungal kua kiang ah ahia a khawlna a lutlou ding a a kichiam?

¹⁹Huchi in ginlahna ziak in a lut theita kei uh chih i thei uhi.