Read Paite Chin HEBRUTE 4 Bible Online

HEBRUTE 4 - Paite Chin bible

HEBRUTE 4

¹Huaiziak in i lau ding uh, huchilou in zaw a khawlna a lutna thuchiam omlai napi, na lak ua kuapeuh chinglou in na omkha zenzen ding uhi.

²Amau kiang a gen a hihbang in Tanchinhoih i kiang ua gen ahi ngal a; himahleh a thuzak uh amaute’n a phattuampih kei uh, a zate toh ginna a a kizomlouh ziak un.

³Ei gingta khinte huai khawlna ah i lut lellel uhi, Ka thangpaihna a ka kichiam bang in ka khawlna ah a lutkei hial ding uh, a chih bang in; leilung pian tung a kipan nate tuh sepzoh a hikhinta hi.

⁴Koilai mun hiam ah ni sagih ni thu hichibang in a gen hi: Huan “Ni sagih ni’n Pathian in a nasep tengteng a khawlsanta” chi in.

⁵Huan hiai mun ah, “Ka khawlna ah a lut kei ding uh,” a chi nawn hi.

⁶Huchi in ni dang a Tanchinhoih za masate thumanlouh ziak in lut kei mahle uh, khenkhatte huai khawlna a a lutna ding ua thuchiam a omlai ziak a lutlai ding a om uhi,

⁷Hun sawttak nung in David ah a ma a kigensa bang in bang ni hiam a septuan nawn hi. “Tuni a aw na zak chiang un na lungtang uh khauhsak kei un chi in.”

⁸Joshua in amaute na khawlsakta hilehzaw, huai nung in ni tuam dang thu gen a ngai kei ding hi.

⁹Huchi in Pathian mite ading in khawlni a khawlna a omlai hi.

¹⁰Pathian in amah nasepte a khawlsan bang in, a khawlna a lut khinsa mi’n leng a nasepte a khawlsan samta hi.

¹¹Huchi in kuamah huai thumanlouhna bang a om a i puk louhna ding un huai khawlna a lut ding in phatuam i ngai ding uhi.

¹²Pathian thu a hinga, thil ahihthei a, namsau hiam tuah bangchibang sang in a hiam a, hinna leh kha, guhlawi leh guhngek tuamkhen hel khop in a sunthei a, lungtang a ngaihtuah leh tupte a theipah thei hi.

¹³huaiziak in thilsiam amah mitmuh a langlou himhim a omkei; I tanchin tutna dingpa mitmuh ah bangkim vuaktang leh kihongsa ahi.

¹⁴Hichi in van mun a paisuak khinsa siampu lianpen thupitak, Jesu Pathian Tapa, i neih ziak in i thugin i pomkip ding uhi.

¹⁵Siampu Lianpen i hatlouh kitheihnate hon theihpih phalou nei i hi kei ua; eimah bang a lam tuamtuama khemna tuaksa, khelh bel khiallou, nei i hi zaw uhi.

¹⁶Huchi in zahngaihna i muh theihna ding leh huh i deih chiang a huhna hehpihna i ngah theihna ding in, hehpihna mangtutphah hangtak in i naih ding uhi.