Read Paite Chin HEBRUTE 6 Bible Online

HEBRUTE 6 - Paite Chin bible

HEBRUTE 6

¹Huchi in Khrist thubulte gen nawnlou in pichin lam i manoh ding uh; thilhih sisate kisikna, Pathian lam a ginna,

²baptisma leh khutngak leh misi thohnawnna leh tangtawn vaihawmna lam thuhilhnate suangphum phum nawnlou in.

³Pathian in pha a sakleh huai bang i hih ngei ding uhi.

⁴Khatvei hihvak a omkhin a, van thilpiak chiamta, Kha Siangthou dawngkhin a,

⁵Pathian thu hoihna leh hun hongom ding a thilhihtheihnate chiamkhin hinapi,

⁶Ginna a kihei mangsan ua leh huchibang mite zaw a kisikna ding ua bawlthak theih ahi kei uhi; Pathian Tapa amau ading a kilhlum tuan nawn a selphou a hih ziak un.

⁷Lou, a tung ua vuahtui ke gige na dawnkhin a, huai khohsak a ompa adia nektheih anteh louhing honsuah pen in Pathian vualzawlna a tang hi.

⁸Himahleh loulingnei leh khaulingnei a suahnak inbel a phatuam kei a; hamsiat in a om ding a, a tawpna haltum ahi ding hi.

⁹Himahleh deihtakte aw, huchibang thu gen mahleng nouzaw huai thil sang a hoihzaw hotdamna toh kizui thilte nei na hih uh ka um uhi.

¹⁰A min ziak a itna a nna nasep uleh misiangthoute nna na sepsak uh na latsak uh leh tutan a leng nasep lai uh mangngilh ding in Pathian mitak lou ahi kei hi.

¹¹Himahleh a tawptan a lametna theihchetna kim mu ding in na thanop ngeingei bang un thanop suah gige chiat le uchin ka chi uhi.

¹²Huchi in na ki thadahsak kei ding ua, ginna leh kuhkalna ziak a thuchiamte gouluah khin khawngte entonte na hi zaw ding uhi.

¹³Pathian in Abraham kiang a thu a chiam lai in, amah sang a thupizaw lou a a kichiam theihlouh ziak in, amah leh amah kilou in a kichiam hi,

¹⁴Taktak in k’on vualzawl ngeingei ding a, hih leng k’on hihpung ding chi in a kichiamta hi.

¹⁵Huchi in kuhkaltak a a thuakkhiak nung in, thilchiam a muta hi.

¹⁶Mihingte zaw a sang ua thupilou zaw in a kichiam ua; a kiselna chiteng uah leng hihkipna ding in kichiam tuh thutawp ahi.

¹⁷Huchi in Pathian in a thiltup hihlamdan tuan theihlouh dan nakpi mahmah a theihsak ut in thuchiam gouluah dingte kiang ah kichiamna a palai sak hi;

¹⁸Pathian thugen zuauthei vual a hihlouhna ah thil kikhek lamdang theilou nihte ziak in, i ma a lametna koih lenkip ding a bitna ding a amah delhte’n hanthawnna thupitak i neih theihna ding in ahi.

¹⁹Huai lametna hinna sikkip in i nei ua, muanhuai leh kiptak ahi, huai lametna puanzak sung ah leng a lutta hi;

²⁰I ma a na paita Jesu, Mun Siangthou pen ah i makaipa a a luttak man in Melkizedek omdan bang a ei ding in tangtawn a siampu lianpen a na hita hi.