Read Paite Chin HEBRUTE 7 Bible Online

HEBRUTE 7 - Paite Chin bible

HEBRUTE 7

¹Hiai “Melkizedek, Salem kumpipa, Tungnungpen siampu, Abraham kumpipate that hongpai na dawn a vualzawlpa ahi.”

²Abraham in “Bangkim ah Sawm a khat” a pia hi. A minkhiakna genchian in a masapen in “Diktatna Kumpipa,” a zom nawn in “Salem Kumpipa” a hinawn a; “Lemna Kumpipa” chihna ahi.

³Amah pa neilou in, nu neilou in, khangthu bei, ompatni neilou hintawpni leng nei samlou in, Pathian Tapa bang a siam tangtawn a siampu hi gige ahizaw hi.

⁴Huchi in suangtu, Abraham in a gallak hoih peuhmah lak a Sawm a khat a piakna pa, huai mipa thupi dan ngaihtuah un.

⁵Levi suante lak a siampu nna tang peuhmah in dan bang in mite lak ah Sawm a khat lak ding thu a unaute uh lak ah a mu uhi, huaite Abraham khal a pawt hisam mahle u leng.

⁶Himahleh a lak ua a suante suikhawmsak samlouh pa’n Abraham lak ah Sawm a khat a la a, thuchiamte kempa a vualzawlta hi.

⁷Himahleh sel vuallouh in a neuzaw tuh a lianzaw vualzawl sak in a om hi.

⁸Huan hiai ah mihing sizel te’n Sawm a khat a mu ua, huai ah bel, a hing gige pen chi a a thu a theisak in a mu hi.

⁹Levi, Sawm a khat lazelpa nangawn in Abraham khut ah Sawm a khat a peta, chih theih ahi;

¹⁰Melkizedek in a nadawn lai in a pa khal ah a omlai hi.

¹¹Huchi in Levi te’n siampu hihna ziak a bukimna muhtheih na hileh huai nuai ah mite’n danthu a na mu ngal ua, Aron omdan bang hilou a Melkizedek omdan bang a siampu dang hongom bang kiphamoh ding ahia?

¹²Siampu hihna a hong kilamdan ziak in dan leng hihlamdan sam a hong kiphamoh hi.

¹³Hiai a thugenpa nam tuammi ahi ngal a, huai nam lak a a kuamah maitam ah a gamtang ngeikei uhi.

¹⁴I Toupa, Juda nam lak a hongsuak ahi chih a kichian hi: Huai nam thu ah Mosi in siampute lam thu bangmah a genkei hi.

¹⁵Melkizedek bang a tangtawn siampu dang hongsuahna in nakpitak in i thugen a chiangsak nawnsem hi;

¹⁶Amah khangthu dan leh Dan thupiak ziak a siampu hilou in, hin tawpneilou leh thil hihtheihna bang zaw in siampu a honghi.

¹⁷“Nang zaw, Melkizedek omdan bang a tangtawn siampu na hi” chih theihsak ahi.

¹⁸A hatlouh leh a phattuamlouhna ziak in thupiak om masa paihkhiak ahi.

¹⁹Dan in bangmah a hih bukimlouh ziak in Pathian in lametna hoihzaw hon lalut in huai pansan in amah i naih theita uhi.

²⁰Huan kichiamna tellou a amah siampu a bawl a hi kei hi:

²¹Siampu dangte zaw kichiamlou a siampu a bawl ahi ua; Jesu bel, nang zaw tangtawn siampu na hi chi in, Toupa a kichiam hi, ka khelkik kei ding chi a a kiang a genpa khut ah a kichiam hi:

²²Huchitak a thupi in Jesu thukhun hoihzaw hihkippa a hong hita hi.

²³Huan siampu tampi a na omtak ziak bel amaute a sizel ua, kuamah omden theilou a hih ziak uh ahi.

²⁴Hiai mi bel tangtawn a omden a hih ziak in, a siampu hihna khentheih vuallouh a nei zaw hi.

²⁵Huchi in amah tawn a Pathian kiang a hongpaite a tawpdong in a hondam thei hi, amaute thumsak a tangtawn a a hin gige ziak in ahi.

²⁶Huchibang siampu lianpen, misiangthou, zulhzau lou, ninbanglou, khialte lak a omtuam, vante sang a tungnung zaw a siam eite a a hong hita hi.

²⁷Aman siampu lianpen dangte lat bang in, niteng in amah khelh ziak a kithoihna lan masa phot a, huai nung a mite khelhna kithoihna a lat a kiphamoh kei hi; Amah a kilat laitak in setden ding in khatvei a na lankhinta hi.

²⁸Dan in mihing hatlouhna neite, siampu lianpen ding in a sep a; himahleh tua kichiam thu, dan nung a hongom in, Tapa mahmah tangtawn siampu ding a hihkim khitsa a sep zawta hi.