Read Paite Chin HEBRUTE 8 Bible Online

HEBRUTE 8 - Paite Chin bible

HEBRUTE 8

¹Huchi in i thugente lak a poimawh pen hiai ahi: Vanmun a Thupipen mangtutphah taklam a vatu Siampu lianpen neite i hi uhi.

²Amah Mun Siangthou leh biakbuk taktak, mihing lam hilou, Toupa lam zaw a nasempa i nei uhi.

³Siampu Lianpen peuhmahte thilpiak leh kithoihnate lan ding a seh ahi ua; huchi in hiai siampu lianpen in banghiam bek latding neih a kiphamoh hi.

⁴Amah leitung a omlai hile zaw, dan bangzel a thilpiakte lan ding omkhinta a hih ziak un, siampu hilou ding ahi.

⁵Amaute’n vanlam thilte etsakna’n a lim nna a sem uhi. Mosi biakbuk lam dia a kisaklai in Pathian hilh a om in, “Mualtung a etton ding k’on etsak bang a biakbuk lam ding in pilvang in” a chi hi.

⁶Tun bel thuchiam hoihzaw tung a kinga thukhun hoihzaw adia nasem palai a hih bang in, nasepna hoihzaw a na tangta hi.

⁷Thukhun masa dembei na hileh, a nihna hongom kullou ding ahi.

⁸Amaute dem in hiai thute a gen hi, “Ngai in, nite a hongtung dek, Toupa’n a chi, huai ni chiang in Israel inkuante leh Judah inkuante kiang ah thukhun thak ka bawl ding:”

⁹“A pi leh pute uh Aigupta gam a kipan a pikhe ding a a khut ka let ni a a kiang ua ka khun bang hilou in; ka thukhun ah a om gige kei uhi, huchi in amau ka limsakta kei,” Toupa’n a chi hi.

¹⁰“Huai ni zoh chiang in Israel inkuante kiang a thu ka khun ding hiaite ahi, Toupa’n a chi: A lungsim uah ka thupiakte ka koih dia, a lungtang uah ka gelh nalai dia, huan amau ading in Pathian ka hidia, kei adin amaute ka mite ahi ding uhi;

¹¹Huan michih in Toupa thei in, chi in amah inveng leh amah unau a thuhilhta kei ding uhi; a neupen a kipan in a lianpen tan in avek un a hon theichiat ding uhi.

¹²A tatleknate uah ka zahngai dia, a khelhnate uleng ka theigige nawnta kei ding hi” chi in.

¹³Thukhun thak chi a a gen ziak in amasa zat nawnlouh ding in a luisakta hi. Huchi in a luita zattaklou mangpah thei ahita hi.