Read Paite Chin JAKOB 1 Bible Online

JAKOB 1 - Paite Chin bible

JAKOB 1

¹Jakob, Pathian leh Toupa Jesu Khrist sikha in, nam sawmlehnih dalhte chibai a buk hi.

²Ka unaute aw, na ginna uh ze-etna in kuhkalna a siam chih thei in, khemna chiteng na tuah chiang un kipahna ngen in sim un.

³Na ginna ze-etna un kuhkalna a siam chih thei in.

⁴Bangmah tasam lou a na kim ua, na vek ua na bit theihna ding un, kuhkalna in semkim hen.

⁵Na lak ua kuapeuh in pilna a taksap leh mi tengteng kiang a itlou leh tailou a pepa Pathian kiang ah ngen hen, huchi in a kiang ah piak a hi ding hi.

⁶Himahleh ginglel hetlou in ginna nei in ngen hen, ginglelmi tuipi kihot huih mutleng leh sep bang ahi.

⁷Huchibang mi’n Toupa kiang ah bangmah muh kiging kei hen.

⁸Lungsim det neiloumi a thilhih tengteng ah a kip kei hi.

⁹Unau daikilkal a om dopsang a a om ziak in kipak hen;

¹⁰Mihau hihneu a a om ziak in kipak zaw hen; loupa pak bang a a man ding ziak in.

¹¹Ni hongsuak a huihlum a hongnun in loupa a vuai a; a pak pulh a; a kilawmna a mangthang hi; huchi mah bang in mihau a paina ah a vuai ding hi.

¹²Khemna thuak teitei mi a hampha hi; ze-et a om nung in hinna lallukhu, Toupa’n amah itte kiang a a chiam a muh ding ziak in.

¹³Kuamah in khemna a tuahlai in Pathian khem ka hi, chi kei hen. Pathian gitlouh a khemvual ahi kei, aman leng kuamah a khem kei hi.

¹⁴Michih amau utna a hip leh pimang a a om chiang un khemna a tuak uh ahizaw hi.

¹⁵Huan utna in nou a pai a, gilou a hong pichin in sihna a suak hi.

¹⁶Ka nau deihtakte aw, khem in omkei un.

¹⁷Thilpiak hoih leh thilpiak buching tunglam a kipan a vakte Pa kiang a kipan a hongsuk ahi a, amah ah lamdanna leh kikhekna lim a omkei hi.

¹⁸A thilsiamte lak a gahmasa i hong hihtheihna ding in, amah deihlam in thutak lak a pan in a hon suangkhia hi.

¹⁹Unau deihtakte aw, huaite na thei uhi, himahleh michih ngaihkhiak kilawp henla, thugen kituhpih kei henla, heh hak hen.

²⁰Mihing thangpaihna in Pathian diktatna a bawl kei hi.

²¹Huaiziak in nin tengteng leh gilou dimval koihmang unla, thu na kha uh hondam thei, thunuailut tak in pom un.

²²Himahleh noumau kikhem in ngaikhete leltak hilou in thuzuite hizaw un.

²³Kuapeuh thu ngaikhia a zui tuanlou zaw limlang a a pianpih maitang hoihtak a ki en bang ahi.

²⁴Hoihtak in a ki en a, a paimang zoh in mi bangchi ahia a hih a ki mangngilh nawnpah hi.

²⁵Himahleh kuapeuh dan bukim, noplenna dan vel a, huchibang a om gige a, ngaikhia a, mangngilh nawn maimah nak bang hiloute zui a nasem gige mi a thilhih ah vualzawl in a om ding hi.

²⁶Kuapeuh sabiak limsak hi a kigingta a, a lei veng hoihlou a, amah lungtang kikhem zaw mi sabiak dan bangmah ahi kei hi.

²⁷I Pathian leh Pa mitmuh a sabiak siangthou leh gilou panglou zaw, tagah leh meithaite a gimthuak lai ua veh leh khovel buahna banglou a kibawl zel ahi,.