Read Paite Chin JAKOB 2 Bible Online

JAKOB 2 - Paite Chin bible

JAKOB 2

¹Ka unaute aw, i Toupa Jesu Khrist, thupina Toupa gingta kawm in, mi khentuam kei un.

²Na kikhopnain uah mi dangkaeng zungbuh bun, puan hoihtak silh honglut henla, huan mi genthei puansetak silh honglut sam leh;

³Puan hoihtak silhmi na limsak ua a kiang ah, “Nang hiai mun hoih ah tu in” na chi ua, mi genthei kiang ah bel, “Nang huai ah na ding inla, ahihkeileh, ka khe ngakna nuai ah tu in” na chih uleh,

⁴na lungsim uah khentuam nei leh ngaihtuahna giloupu, gense mite na honghi kei ding ua hia?

⁵Ka unau deihtakte aw, Pathian in hiai khovel a gentheite ginna a hau ding leh amah itte kiang a a chiam gam luah ding in a chi kei a hia?

⁶Nou bel migentheite na zahlaksak zaw uhi. Mihaute hilou uhia nou hon nuaisiah? Mihaute hilou uhia vaihawmna a nou hon kailut?

⁷Amaute hilou uhia min hoih na put uh gensete?

⁸Himahleh Laisiangthou in, “Nangmah na ki-it bang in na vengte na it ding ahi” chih kumpi dan na zop uleh na hih hoih uhi.

⁹Himahleh mi khentuam na neih uleh, na hihkhial uhi, dan in talekte na hih uh a hon theisak zawta hi.

¹⁰Kuapeuh in dan zuikim mahleh munkhat a a hihkhelh leh, avek ah siamlouh tang in a omkhin hi.

¹¹“Angkawm ken” chipan “Tualthat ken” a chilai hi. Huchi in angkawm keimah lechin tual na thah in, dan a talekpa na hita hi.

¹²Huaiziak in noplenna dan a vai hawmsak dingte bang in thugen unla, thilhih behlap un.

¹³Mi tung a chitna neilou chitna panglou in vai a hawmsak nak uhi. Vaihawmna tung a vualzou zahngaihna ahi.

¹⁴Ka unaute aw, min ginna ka nei chi mahleh thilhih a neihkei leh bang a phatuam dia? Huchibang ginna in amah a hondam thei dia hia?

¹⁵Unaupa hiam, unau nu hiam, vuaktang a om in a niteng annek tasam le uh,

¹⁶Na lak ua kuahiam in a kiang ah, “Khamuangtak in pai inla, lumtak leh vahtak in om in” chi in a sa ading a thil kiphamoh pe tuankei leh bang a phatuam dia?

¹⁷Huchi mah bang in ginna leng thilhih neilou a amah kia a a om leh si ahi.

¹⁸Ahi, mi kuahiam in “Nang ginna na nei a, ken thilhih ka nei hi;” na ginna na thilhih panglou in hon ensak inla ken thilhih in ka ginna k’on ensak ding a chithei hi.

¹⁹Pathian khat kia ahi chih na gingta maw? Na hihhoih e: dawite’n leng a gingta ua, a ling zel uhi, a chi ding hi.

²⁰Mi thulimlou aw, thilhih panglou a ginna lel bangmah ahi kei chih na thei nuam hia?

²¹I pu uh Abraham in a tapa Isak maitam tung a a latlai in thilhih ziak a siamtang ahi kei a hia?

²²Ginna in thilhih toh a semkhawm a, thilhih ziak in ginna a bukimta chih i thei uhi.

²³“Abraham in Pathian a gingta a, huai ginna a diktatna a sim ahi” chih Laisiangthou hihkim in a om hi; huchi in amah Pathian lawm chih in a om hi.

²⁴Ginna ziak kia hilou in, thilhih ziak zaw in min siam a tangzel uh chih na theita uhi.

²⁵Huchibang in, Rahab kizuaknu’n leng sawltakte a na kipahpih a lamtuam a a paisak lai in, thilhih ziak in siamtang ahi kei maw?

²⁶Kha panglou in pumpi a si hi, huchibang in thilhih panglou in ginna leng si ahi.