Read Paite Chin JAKOB 3 Bible Online

JAKOB 3 - Paite Chin bible

JAKOB 3

¹Ka unaute aw, na lak uah mi tampi heutu in hong omkei un, heutu in vaihawmna thupi sem a tuak ding chih i thei uhi.

²Thil tampi ah i vek un i gilou nak uhi. Kuapeuh thugen lam a a gitlouh kei leh mi piching ahi a, a pumpi vengthei mi ahi.

³Ngai un, Sakolte’n i thu a man theihna ding un a kam uah kamkaihna sikkual i bat leh a pumpi uh i kaihei hi.

⁴Longte leng ngaihtuah sam un, a lian mahmah ua, huih hat mutleng in a om nak uhi, himahleh a longhekpa’n a paisak utna lam peuh ah a hekna neuchik petmah in a kiheisak hi.

⁵Hichibang in lei pumpi hiang neuchik ahi a, nakpitak in a kiuangsak nak hi. Ngai un, mei neuchik phet in sing nak katsak natel e!

⁶Huan lei tuh mei ahi, pumpi hiangte lak a gitlouhna lumpi, pumpi avek a ninsak a, mihing kisuansawn dan pianphungpi kangsak ahi; huai lei mah in gawtmun mei toh a peh hi.

⁷Sa chichih, vasa chichih, ganhing chichih tuipi ate khoizual theih ahi ua, mite khoizual in a om uhi.

⁸Himahleh lei zaw kuamah in a khoizual theikei uhi; sihna gu a dim gilou om kinken theilou ahi.

⁹Huai lei in Pa Pathian i phat ua; huai mah in Pathian bang a bawl mihingte i hamsiat uhi.

¹⁰Kam khat a kipan in phatna leh hamsia a pawtnak hi. Ka unaute aw, huchibang ding hilou ahi.

¹¹Tuikhuk khat in nak khat mah a kipan in tui lim leh limlou a suaksak zel a hia?

¹²Ka unaute aw, theipi kung ah Olive thei a gahthei ahia? Ahihkeileh grepgui ah theipi a gah thei ahia? Huchibang in chikhuk in tui allou a suaksak thei sam kei hi.

¹³Na lak uah kua a pil in, thu a theithei a? Thunuailut leh piltak in a thilhihte omdan hoih in ensak hen.

¹⁴Himahleh na lungtang uah hazatna thupitak leh kidemna na neih uleh thudik zuausan kei un.

¹⁵Huai bang pilna zaw tunglam a kipan a hong paisuk ahikei a, khovel leh pumpi utna dawi a kipan ahizaw hi.

¹⁶Hazatna leh kidemna omna ah buaina leh thil hihkhelhna chiteng a om hi.

¹⁷Tunglam a kipan pilna bel, a tung in a siangthou phot a, huaikhit in kituah a ut a, a nunnem a, a chihnuam a, hehpihna leh gah hoih in a dim a, khentuam a neikei a, a lepchiah kei hi.

¹⁸Diktatna gah kilemna bawlte’n a tuh uh lemna gah ahi.