Read Paite Chin JAKOB 4 Bible Online

JAKOB 4 - Paite Chin bible

JAKOB 4

¹Na lak ua kidouna leh kinaknate koi a kipan a hongsuak ahi ua? Na sapum hiangte ua kidouna bawlnak, na duhgawlna ua kipante a pawt ahi kei ua hia?

²Na lunggulh ua, na nei tuankei ua; na that ua, na eng ua, na kidou ua, gal na bawl ua, na nei tuankei uh, na ngetlouh ziak un.

³Na ngen ua, na nget diklouh ziak un na mu kei uh, na nopsak bawlna ding ua zat na tup ziak un.

⁴Nou angkawm hatte aw, khovel lawm hihna Pathian melma hihna ahi chih na theikei ua hia? Huchi in kuapeuh khovel lawm hih ut Pathian melma in a kibawl nak hi.

⁵Ahihkeileh eimah a teng Kha in “Haza khop hial in a hondeih chih Laisiangthou in a gen bangmahlou in na ngaihtuah ua hia?”

⁶Himahleh hehpihna tamsem a penak hi. Huaiziak in Laisiangthou in, “Pathian in mi kisatheite a dou a, kingaineute hehpihna a penak” a chi hi.

⁷Huchi in Pathian thuthu in om un; himahleh Diabol dou un, a hon taimangsan ding hi.

⁸Pathian naih unla, aman a honnaih ding. Khialte aw, na khut uh silsiang un: lungsim bulbal neiloute aw, na lungtang uh hihsiangthou un.

⁹Haksa sa unla, lungkham unla, kapkhia un; na nuih uh kahna suak henla, na kipah uh lungkhamna suak hen.

¹⁰Toupa mitmuh in kingaineu un, huchi in a hon hihlian ding hi.

¹¹Unaute aw, ki gensetuah kei un. Kuapeuh in a unau a gensiat hiam a vaihawm khum leh dan a gensia a vaihawm khum ahi; dan na gensiat leh dan zuimi na hi kei a, vaihawmpa na hizaw hi.

¹²Dan pepa leh vaihawmpa, amah hondam theipa leh hihmang theipa khatlel a om hi; Nang na vengte vaihawm khum kua kisa na hia?

¹³Tun ah noute’n ngai un, “Tuni hiam zingchiang hiam in, huai khopi ah i hawh ding ua, huai ah kum khat i va tam ding ua, i sumsin ding ua, punna i mu ding,” chite aw.

¹⁴Zingchiang a bang hongom ding ahia chih nathei kei uhi. Na hinna uh bang ahia? Mei sawtlou kal a hongdawk a, mangnawn lel bang na hi uhi.

¹⁵Huchi in “Toupa’n pha a sakleh i dam dia, hiai hiam, huai hiam i hih ding” na chih ding uh ahi.

¹⁶Himahleh na ki-otsaknate uh na suangzaw ua, huai bang suanna tengteng gilou ahi.

¹⁷Huchi in kuapeuh thil hoih ding thei a hih tuanlou zaw amah ading in khelhna ahi.