Read Paite Chin JAKOB 5 Bible Online

JAKOB 5 - Paite Chin bible

JAKOB 5

¹Mihausate aw, Ngai un! Na tung ua gimthuakna hongtung ding ziak in kap unla, mau tuaituai un.

²Na goute uh a seta hi, na puante uh leikha in nekhinta hi.

³Na dangkaeng uleh na dangkate uh a tuiek khinta hi; a tuiek nou hon mawhpaihtu leh meikang bang a na sa uh kangse zou ahi ding hi.

⁴Ngai un, na lou ua buh at a kilohte loh amau khem a na piaklouh uh a kikou ua, buh atte mangbang kikou aw Mipite Toupa bil ah a lutta hi.

⁵Khovel ah nuamsatak in na om ua, na kizangbei mawkmawk ua, na thahni un na lungtang uh na taisak uhi.

⁶Midiktat, nou a hondou loute siamlouh tangsak in na that uhi.

⁷Huchi in unaute aw, Toupa hong paima teng kuhkaltak in om un. Ngai un, louneimi in vuahtui ke masa leh nanung a muh mateng leigah hoihtak a ngak zel hi.

⁸Nou leng kuhkaltak in om un; na lungtang uh hihkip un; Toupa hongpaina ding a naita hi.

⁹Unaute aw, siamlouhtang a na omlouhna ding un, ki phunkhum kei un; ngai un, vaihawmpa kongkhak bul ah ading hi.

¹⁰Unaute aw, Toupa min a thugenmi zawlneite thuakdan leh kuhkal dan uh zuih ding in nei un.

¹¹Ngai un, a thuak mite tuh nuamsa i chi uhi; Job kuhkal dan na zata ua, Toupa’n a tawp a ahihdan leh Toupa hehpihna a dim dan leh zah a ngaih theih dan leng na mu uhi.

¹²Himahleh ka unaute aw, bangteng tung ah, kichiam kei un; van lou in hiam, lei lou in hiam, thil dang himhim lou in hiam kichiam kei un. “Hi” na chih uh 'hi' henla; “Hilou” na chih uh 'hilou' hi hen; huchilou in zaw siamlouh tang in na om ding uhi.

¹³Na lak uah thil hoihlou thuak a om uhia? Thum uhen. Kipak a om uhia? Phatna lasa uhen.

¹⁴Na lak uah damlou a om uhia? Saptuam Upa samsak uhenla, aman Toupa min a sathau nilh in a tung ah thum hen;

¹⁵Huan ginna a thumna in damlou a dam ding a, Toupa’n amah a kaithou ding; thil a hihkhelh takleh ngaihdam ahi ding hi.

¹⁶Huchi in hihdam a na omtheihna ding un, na khelhnate uh thupha kitawituah unla, ki thumsak tuah un.

¹⁷Midiktat thumna in thil thupitak a hihzel hi. Elijah leng eimah piandan bang pu mihing ahi a, ama’n vuah zuklouhna ding in phatuamngaitak in a thum a, kum thum leh kha guk sungteng leitung ah vuah a zukei hi.

¹⁸A thum nawn a, van in vuah a zusak a, lei in a gahte a honsuah hi.

¹⁹Ka unaute aw, na lak ua mi kuapeuh thutak a kipan in pialmang henla kuahiam in pikik nawn leh,

²⁰Mikhial a lamhaihna a kipan a kiheisak pa’n sihna a kipan a kha a hondam ding a, khelhna tampi a khuhsak lai ding chih kithei hen.