Read Paite Chin 1 PETER 1 Bible Online

1 PETER 1 - Paite Chin bible

1 PETER 1

¹Peter, Jesu Khrist sawltak in, Pontus gam, Galatia gam, Kappadosia gam, Asia gam Bithinia leh gam tuamtuam a mikhual dalhzakte kiang ah;

²Pathian, i Pa theihkholh bang a Jesu Khrist thumanna leh sisan theh tang ding a Kha hihtuamna tungtawn a tel a omte kiang ah: Na tung uah hehpihna leh lemna hihkhan in om hen.

³I Toupa Jesu Khrist leh Pa Pathian phat in om hen! Aman a hehpihna thupitak bangzel in, misi lak a kipan Jesu Khrist thohnawnna ziak in lametna hing mu ding in a honsuang nawn hi,

⁴Goutan setheilou, ninbanglou, tultheilou, van a nou a ding a sit muhna ding in.

⁵Hotdamna, hun nanung a lang ding a zohsa mu ding in, ginna ziak in Pathian thilhihtheihna a ven na hi uhi.

⁶Tuin khemna chiteng ziak in hun sawtlou lungkham tadih mahle uchin, huai ah nakpitak in na kipak uhi.

⁷Na ginna uh ze-etna, dangkaeng mei a ze-et nung nangawn a mangthang zel sang a manpha zaw, Jesu Khrist kilak chiang in phatna leh pahtawina leh thupina ding a hong hihtheihna ding in.

⁸Mu ngeilou napi’n amah na it ua, tuin mu tadih kei mahle uchin, amah na gingta ua, kipahna gentheihlouh leh thupina a dim in na kipak mahmah uhi.

⁹Na ginna un a tuppen na kha uh hotdamna na mu uhi.

¹⁰Huai hotdamna thu zawlneite hehpihna na kiang ua hongtung ding thugenkholte’n, a kankan ua, siamneltak in a zongkhia uhi.

¹¹Khrist kha amau a om in Khrist thuakna ding leh thupina honzui dingte a theihkholhsak lai in, bang hun a bangchi a hongtung ding hiam chih zonkhiak a tum uhi.

¹²Huai thu in amau nasep kiseplou in, noumau nasep a semzaw uh chih a kiang uah theihsak ahita, huai thute van a kipan a sawlkhiak Kha Siangthou panpih in Tanchinhoih nou hon hilhte’n tuin a honhilh ua, huai thilte angelte’n leng vel a ut uhi.

¹³Huaiziak in na lungsim puan uh teng in pilvang unla, Jesu Khrist kilak chiang in hehpihna nou a honpuak ding lungke lou in lamen un;

¹⁴Ta thumangte bang in, na theihlouh lai ua na nidanglai duhgawlna uh bang a omlou in;

¹⁵Nou honsampa a siangthou bang in nou leng na tatdan tengteng uah hong siangthou un;

¹⁶Noute na siangthou ding uh ahi, kei ka siangthou ngal a, chih gelh ahi.

¹⁷Huan khentuam neilou a michih nasep bang chiat a ngaihtuahpa Pa bang a na loh uleh, hiai lai a na tam laiteng un laudansiam in om un.

¹⁸Na pipute uh piaksawn, na omdan uh bangmah hilou a kipan, thil sethei, dangka leh dangkaeng a tat na hi kei ua,

¹⁹Belamnou gensiatbei leh ninbanglou sisan bang a, Khrist sisan pha a tat na hizaw uh chih na thei uhi.

²⁰Amah leilung pianma in sehkholh in a om ngei tak a, himahleh hun nanung ah noumau ziak in kilak in a om hi.

²¹Amah ziak in misilak a kipan kaithoupa leh a thupina pepa Pathian gingtate na hi uhi, na ginna uh leh na lametna uh Pathian a a om theihna ding in.

²²Unaute it taktak ding a thutak zui a na kha uh na hihsiangthou tak ziak un lungtang a phatuamngaitak in ki-ittuah chiat un.

²³Chi sethei lak ah hilou in, Pathian thuhing gige leh om gige chi setheilou lak a piang thak na hi zaw uhi.

²⁴“Mi tengteng loupa bang ahi ua, a thupina uh leng loupa pak bang ahi. Loupa a vuaia, a pak a pulh hi.

²⁵Toupa bel tangtawn in a om gige hi” chih ahi ngal a. Huai ahi Tanchinhoih nou a honhilh pen uh.