Read Paite Chin 1 PETER 2 Bible Online

1 PETER 2 - Paite Chin bible

1 PETER 2

¹Huchi in gitlouhna tengteng, zekhemna tengteng, lepchiahna tengteng, hazatna tengteng, gensiatna tengteng tawpsan unla,

²naungek suak thakte bang in khalam nawitui bangmah hellouh lunggulh un, huai a na khan theihna ding un.

³Toupa mi hehpihtheitak ahi chih na chiam khinta uhi.

⁴Amah suang hing, mihingte deihlouh, Pathian theih a bel tel leh manpha ahi.

⁵Amah kiang a hongpai in, noute leng suang hingte bang in Jesu Khrist ziak a Pathian kipahlam kithoihna lan ding in siampu siangthou hi ding in khalam inn a leptouh in na om uhi.

⁶Huaiziak in Laisiangthou ah: “Ngai un, Zion ah a ning a suang kiphamoh pen tel leh manpha tak ka lem hi; amah gingtate a zahlak kei ding uh” chih a tuang hi.

⁷Nou a gingtate ading in huai manphapi ahi, a gingtaloute ding in bel: “Inlamte suang deihlouh pen, huai mah a ning a suang phatuam pen a hong hita hi.”

⁸Huan, “Pukna suang leh dalna suangpi ahi. Thu kigente a zuihlouh ziak un a kisui puk ua; huchibang ding a sehsa ahi him uhi.”

⁹Himahleh mial a kipan pawt a, vak lamdangtak a lut ding a nou honsampa hoihna na muhsak theihna ding un, nou zaw chi tel, kumpi siampute, nam siangthou, Pathian mite na hi uhi:

¹⁰Nidanglai in nam himhim na hi kei ua; tun zaw Pathian namte na hita uhi; nidanglai in zahngaihna na mu kei ua, tun zaw zahngaihna na muta uhi.

¹¹Deihtakte aw, mikhual leh khualzin na hih ziak un kha dou nakpa sautnate tawpsan ding in nou k’on ngen hi;

¹²Jentelte lak a na tatdan uh kilawmtak hi hen, huchi in thilhihkhial a, a hon gensiat chiang un leng na thil hoih hih a muhte uh ziak in veha a om chiang un Pathian a pahtawi thei ding uhi.

¹³Toupa ziak in mihing dan bawl peuhmah ah lutun; tungnung a om kumpipa kiang ah hiam,

¹⁴thil hihkhialte tung a thuk ding leh thil hoih hihte phat ding a kumpipa’n a seh gam ukpate thunuai ah lut un.

¹⁵Hiai Pathian deihlam ahi, mihaite haina thil hoih hih in na hihdai thei ding uhi;

¹⁶Nuamlen na hi ua, himahleh na noplenna uh khelhna khuhna ding a zanglou in Pathian sikha a omna ding in zang zaw un.

¹⁷Mi tengteng zahtak un. Unaute it un; Pathian laudan siam un. Kumpipa pahtawi un.

¹⁸Sikhate aw, mi hoih leh mi nunnemte lak kia hilou in migiloute lak ah leng laudansiam in nou hon heute thuthu in om un.

¹⁹Min Pathian theihna ziak in thuaklouh ding thuak in lungkhamna a thuak teitei leh huai pen Pathian pahtak lam ahi.

²⁰Nou na thilhihkhelh ziak ua vuak na thuak un, kuhkaltak in thuak mahle uchin phatna bang na loh ua? Himahleh na thil hoih hih ziak ua na thuak ua kuhkaltak a na thuak ua leh huai pen Pathian kipah lam ahi.

²¹Khrist in leng nou a hon thuaksak ziak in, huaibang hihding a sap na hi uhi; a khap a na zuihna ding un zuih ding a hon nutsiat ahi.

²²“Aman thil a hihkhial kei a, a kam ah zekhemna leng a omsam kei;”

²³Mi’n a kou lai in, a kouthuk kei a, a thuaklai in a vau kei hi; diktattak a ngaihtuahpa kiang ah a kipe zaw hi.

²⁴Khelhna lam a sikhin a diktatna lam a i hintheihna ding in amahmah in tua sing ah a sa in i khelhnate a pua hi; amah vuakna golhte ah hihdam in na omta uhi.

²⁵Belam mang bang in na mang ua, tun zaw nou hon chingpa leh heutupa kiang ah na kik nawnta uhi.