Read Paite Chin 1 PETER 3 Bible Online

1 PETER 3 - Paite Chin bible

1 PETER 3

¹Huchibang in, nou zite aw, noumau pasalte thuthu in om un, huchi in a lak ua khenkhat in Pathian thu umkei mahle uh na tatdan uh zoh in a om ding uhi.

²Laudansiam kawm a na tatdan siangthou uh en in.

³Na kivatna uh pawlam kivatna samphek leh dangkaeng khi awh hiam, puansilh kivatte hilou in,

⁴Lungtang a mihing thuguk lungsim thunuailut leh nunnem puansilh setheilou a kivat Pathian mitmuh in a manpha mahmah hi.

⁵Huchibang in tuma lam a numei siangthou Pathian gingtate’n leng amau pasalte thuthu a om in a kivan uhi.

⁶Sarah in Abraham toupa chi a a thuthu a a om bang in; thil hoih hih a, khemlauna himhim laulou a na om uleh Sarah tate na hi ding uhi.

⁷Nou pasalte aw, huchi mah bang in, numei zaw bel kitambaih zaw a hih ziak un leh hehpihna hinna tanpihte a hih ziak un, pahtawi kawm in theihna bangzel in na zite uh kiang ah om un, na thumna uh dala a om louhna ding in.

⁸Atawppen in, navek un lungsim munkhat in om unla, ki lainat tuah unla, thunuailut in om un.

⁹Khelhna, khelhna in thukkei unla, salhna, salhna in thuk sam kei unla, vualzawl zaw un. Hiai vualzawlna tang ding in sap na hi uhi.

¹⁰“Hinna it ut leh nihoihte muh ut in khelhna lak ah a lei veng hoih leh, a muk leng zekhemna thu genlou ding in veng hoih hen.

¹¹“Gilou nungngat san in thil hoih hih hen; kituahna zong in delhzel hen.

¹²“Toupa mit in midiktatte tung ah a tu a, a bil leng a thumna lam uah a dohzel hi, himahleh Toupa mel in thil hihkhialte a dou nak” chih gelh ahi.

¹³Thil hoih lam a phatuam na ngaih uleh na pawikhoih ding uh kua a om dia?

¹⁴Himahleh diktatna ziak a na thuakta bang na hih uleh, na hampha ding uhi. A kihtakhuaina uh kihta kei un;

¹⁵Himahleh na lungtang uah Khrist Toupa in bawl un; noumau a om, na lamet pen uh hon dong peuhmah dawng ding in mansa gige in thunuailuttak leh laudansiam kawm in om un:

¹⁶Sialehpha theihna siangtak nei un, huchi in nou a hon gensiatna lam uah, Khrist a na omdan hoih uh gen thanghuaite hih zahlak in a om ding uhi.

¹⁷Thil gilou hih ziak a thuak sang in Pathian hoihsak lam ahihleh thil hoih hih ziak a thuak a hoihzaw hi.

¹⁸Pathian kiang a honpi theihna ding in Khrist in khelhnate ziak in khatvei a thuakta hi, midiktat in midiktatloute sik in a thuak a; sa ah hih sih in a om a, kha ah hihhin in a omta hi.

¹⁹Huai kha in suangkulh a kha omte kiang a thu a va tangkoupih hi.

²⁰Huai mite’n nidanglai a Noah damlai a long bawl sungteng a, Pathian thuakzohna in a ngaklai in thu a mangkei ua; huai long ah mi tawmchik, mi giat tui apan humbit in a om uhi.

²¹Huan huai tui in Jesu Khrist thohnawnna ziak a hotdamna baptisma lim hon ensak a, huai bel sapum nitna siansakna dan hilou in, sialehpha theihna siansakna ziak a Pathian kiang naihna ahizaw hi.

²²Amah van a pai in Pathian taklam ah a om a; angelte, thuneihnate, thilhihtheihnate amah thuthu a omsak in a omta hi.