Read Paite Chin 1 PETER 5 Bible Online

1 PETER 5 - Paite Chin bible

1 PETER 5

¹Huchi in na lak ua saptuam upate kei na upat pih uh, Khrist thuaknate theipa leh thupina honglang ding tangsam ding in hiai bang in k’on hanthawn hi;

²Na lak ua Pathian pawl omte kem un; hihding a hih ziak hilou in, Pathian thu bang a utzaw in, punna thanghuai deih ziak hilou in, lungsim a deihtaktak zaw in.

³Na tante uh tung ah kiliansak tuanlou in pawlte zuih ding a kibawlzaw in, kem un.

⁴Huchi in Belamchingpa lianpen a honglat chiang in, thupina lallukhu tultheilou na mu ding uhi.

⁵Huchi mah bang in, nou valnoute aw, upate nuai ah lut un. Ahi, na vek ua na kisepsak tuah chiat ding in thunuailutna in kithuam un; “Pathian in kisatheite a dou a, kingaineute hehpihna a penak hi.”

⁶Huaiziak in a huntak a nou a hon pahtawi theihna ding in, Pathian khut hattak nuai ah kihihniam un:

⁷Aman a hon limsak gige ziak in na mangbatna tengteng uh amah ah nga vek un.

⁸Pilvang unla, limsak un; na melma uh Diabol, humpinelkai humham bang in a nek theih ding zong in a vialvak hi.

⁹Na unau uh khovel a omte tung ah huchibang thuaknate a tungsam chih thei in ging kiptak a om in, amah dou un.

¹⁰Huan hehpihna tengteng Pathian, a tangtawn thupina tang ding a Khrist a nou honsampa ngei in, sawtloukal na thuak nung un a hoih bukim a honbawl in, hon hihkip in, a hon hihhat ding hi.

¹¹Amah kiang ah vaihawmna tangtawn in om hen, Amen.

¹²Ka unaupa muanhuaitak Silvana khut in, noumau hanthawn leh huai Pathian hehpihna taktak ahi chih thei in, tomchik in na kiang uah ka gelh ahi; huaite ah ding kip un.

¹³Babulon khua a om noumau bang a telnu’n chibai a honbuk hi; huchibang in ka tapa Mark in leng chibai a honbuk ahi.

¹⁴Itna kitawpna a tawp in chibai kibuk un, Na lak ua Khrist a om peuhmahte kiang ah lemna om hen, Amen.