Read Paite Chin 2 PETER 1 Bible Online

2 PETER 1 - Paite Chin bible

2 PETER 1

¹Simon Peter, Jesu Khrist sikha leh sawltak in, Jesu Khrist, i Pathian leh Hondampa diktatna ziak a ginna mantamtak i tan bang tangsamte kiang ah:

²‍Pathian leh i Toupa Jesu Khrist theihna tungtawn in hehpihna leh lemna noute sung ah hihkhan in om hen.

³Amah thupina leh hoihna ziak a honsampa, a tanchin theih ziak in a Pathian thilhihtheihna in hinna leh Pathian limsakna lamthu ah thil tengteng a hon peta hi.

⁴‍Huaite ziak in a thuchiam manphatak leh thupi mahmahte a honpia hi; huchi in utna ziak a khovel a siatna hongom taikhiak san in; huai thuchiam manphatak leh thupi mahmahte ziak in Pathian omdan na kikoppih thei sam ding uhi.

⁵Ahi, huaiziak tak in, thanop himhim suah in, na ginna uah hoihna hel unla, na hoihna uah theihna hel unla,

⁶‍Na theihna uah kidekna hel unla, na kidekna uah kuhkalna hel unla, na kukhalna uah Pathian limsakna hel unla,

⁷‍Na Pathian limsakna uah unaute itna hel unla, na unaute itna ah itna hel un.

⁸‍Huaite nou a a hih a, a khanzel leh, i Toupa Jesu Khrist theihna lam ah thadahlou leh gahlou lou in nou a honbawl ding hi.

⁹‍Kuapeuh huai thilte neilou mittaw, naichikte kia muthei, a nidanglai khelhnate siansakna mangngilhte ahi uhi.

¹⁰‍Huaiziak in unaute aw, nou a honsapna leh a hontelna hihkip ding in thanop suah semsem un; huaite na hih uleh chiklai mah in na puk kei ding uhi.

¹¹‍Huchi in Jesu Khrist i Toupa leh Hondampa’n tangtawn gam a lutna a hon musak law mahmah ding hi.

¹²‍Huaiziak in huai thilte nei in na kiang ua om thutak a phuhkip hitamah le uchin, huai thutak mah k’on theisak nawn ding hi.

¹³‍Huan hiai sapum a ka omlai teng noumau hon theihpih in hon tohhalh gige hoih ka sa hi.

¹⁴‍I Toupa Jesu Khrist in hon theihsak bang in ka sapum puanin koihkhiak hun ding hongtung pah ding chih ka thei hi.

¹⁵Ahi ka paikhiak nung in huai thilte na theihgigena ding un ka kisuk ding hi.

¹⁶‍I Toupa Jesu Khrist thilhihtheihna leh a hong paina thu k’on theihsak lai un, tangthu piltak a ngaihtuah khiakphet zui ka hi kei ua, a thupina mute ka hi zaw uhi.

¹⁷Aman Pa Pathian kiang a kipan in pahtawina leh thupina a mu a, huchihlai in thupina thupitak a kipan in hichibang aw a kiang a hongtung hi, “Hiai ka Tapa deihtak, ka kipahna mahmah ahi” chi in.

¹⁸‍Huan tang siangthou a a kiang a ka om ziak un huai aw van a kipan a hongsuak koumau ngei in ka za uhi.

¹⁹‍Huchi in genkholhna thu kipnawn sem i nei uhi. Khua a hongvak a, zingsol aksi na lungtang ua a hongsuah masiah hiai thu khawnvak mun mial a vak a limsak bang ua, na limsak uleh na hih hoih ding uhi.

²⁰‍Laisiangthou a thugenkholh himhim eimah kihilhchian ding ahi kei chih thei masa un.

²¹‍Thugenkholh himhim mihing thu a pawt ahi ngeikei a, mite’n Kha Siangthou sawl in, Pathian a kipan a genzaw uhi.