Read Paite Chin 2 PETER 2 Bible Online

2 PETER 2 - Paite Chin bible

2 PETER 2

¹Himahleh mite lak ah zawlnei takloute leng a hongpawt ua, huchi mah bang in na lak uah heute takloute a hongom ding uhi, amaute leipa Toupa hilhial tawpsan in mi hihsethei ginna tuam a guk in a hon lutpih ding ua, amau tung ah thakhat in manthatna a tungsak ding uhi.

²‍Mi tampi in a zautatna lam thil uh a honching ding ua, amau ziak in lampi dik gensiat ahi ding hi.

³‍Sum deihna ziak in zuauthu in sumsinna ding in nou a honzang ding uh; himahleh nidanglai a omsa a mohtanna ding uh a khawl kei a, a manthatna uh leng a ihmu kei hi.

⁴Angelte’n thil a hihkhelh un Pathian in a hawikei a, gawtmun ah a pai a, vaihawm ding in guam khukthuk mial ah a khum hi.

⁵Amah limsakloute omna khovel ah tuichim tungsak in, nidanglai khovel a hawikei a, himahleh Noah diktatna thugenpa midang sagih toh a hondamta hi.

⁶‍Sodom leh Gomorrah khuate amah limsaklou hongom dingte etsakna ding in a zang a, vut suaksak in hih mangthang in siamlouh a tangsakta hi;

⁷‍Huan Lot midiktat, migiloute omdan huktak ziak a lungkham mahmahpa a hondamta hi.

⁸‍Huai mi diktatpa a lak ua a om in, a mit in a mu a, a bil in a za a, danlou bang a a thilhihte un a lungsim diktat niteng in a hihna mahmah hi.

⁹‍Toupa’n amah limsakmite khemna apat hotkhiak dan leh diktatloute vaihawm ni ading a gawt kawm a hawidan a thei hi.

¹⁰‍Utna thanghuai lam a sa bang a om leh, vaihawm sakna musitmite ngialhouh vaihawmni ading a gawt kawm a hawidan a theisem hi. Haihan leh chihhak ahi ua a mi thupite a gensiat un leng a ling kei uhi.

¹¹Angel hatna leh thilhihtheihna neite’n amaute dem in Toupa ma ah a gense ngeikei uhi.

¹²‍Himahleh hiaite’n bel ganhing ngaihtuahna neilou, mat a hihman dingte bang in, thil a theihlouhte uh a gensia uhi.

¹³Amau diktatlouhna gahlou in a segawp ding ua, sun tanglai a zu leh sa kham a buai nuamsa mi ahi uh. Na kiang ua Ankuang a lui un, amau kikhemna Ankuanglui a hih ziak un, thanghuaina gensiatna ahi uhi;

¹⁴‍Mit angkawm a dim, khelhna tawpsan theiloute a nei ua; mi kiploute a khempuk ua; en hat lungsim a pu ua; hamsethuak tate ahi uhi.

¹⁵‍Boer tapa Balaam, thilhih khelhna, loh deihpa lampi a tot ziak un lam dik paisan in a vakmang uhi;

¹⁶‍Himahleh amah a tatlekna ziak in taihilh in a omta a; sabiltung pau theilou mihing pau in a hongpau a, zawlnei haina a kham hi.

¹⁷‍Hiaite tuikhuk tui omlou leh tuimei huihpi mut leng ahi ua; amaute ading in nuailam mial sah meuhmouh sit ahita hi.

¹⁸‍Thuginalou chiakzen a gen in gitlouhna lak a kipan a taikhete sa utna ah hukna in a khempuk nak uhi.

¹⁹Amau siatna sikha hikawm pi in mite sikha suahtakna thu a chiam nak uhi; mite’n zohsa a chihte mah in amau sikha in a bawl nak hi.

²⁰Toupa leh Hondampa Jesu Khrist a theih ziak ua khovel thanghuainate a taikhiaksan nung ua, huai mah a a tannawn ua, zoh a a om nawn ua leh zaw, a omdan nanung uh amasa sang in a hong hoihkei zaw hi.

²¹‍Diktatna lampi pen theihnung a, thupiak siangthou a kiang ua kepsak nungngatsan sang in, diktatna lampi theilou hile uh amau ading in a hoihzaw ding hi.

²²“Ui amah luak ah a kiknawn a, vawkpi kisil siangsa leng buannawi ah kisil ding in a kiknawn chih paunak diktak amau tung ah a tungta hi.”