Read Paite Chin 2 PETER 3 Bible Online

2 PETER 3 - Paite Chin bible

2 PETER 3

¹Deihtakte aw, tua na kiang ua ka gelh laikhak nihna ahi. Hiai tegel ah theihthaknawnna in na lungsim siang uh ka tokthou hi.

²‍Zawlnei siangthoute thugen kholh leh na sawltakte uh kam a Toupa leh Hondampa thupiak na theihgigena ding un.

³‍Hiai thei masa un, ni nanungte ah, mi simmohhatte amau utna bang a om in, simmawh kawm in a hongpai ding uhi;

⁴‍“A hongpai nawnna thuchiam koi ah? Siam tung a kipan bangkim a om ngeingei bang in pi leh pute ihmut ni a kipan in a om zel a! a honchi ding uhi.

⁵‍Pathian thu in nidanglai in vante a hongom a chih a kitheihmohbawl uhi.

⁶‍Leitung tui a kipan leh tui zang a bawl ahi a, huai tui mah in a tum a, a mangthangta hi;

⁷‍Himahleh tua vante leh lei omte huai thu mah in Pathian limsaklou mite vaihawm leh manthat ni ading a sit in mei hihsiat ding a kholkhawm ahita hi.

⁸‍Himahleh deihtakte aw, hiai thu kamkhat pen mangngilh kei un, Toupa ngaih in ni khat tuh kum sang khat bang ahi a, huan kum sang khat leng ni khat bang ahi, chih.

⁹‍Mi khenkhat in zekai a sak bang un Toupa zaw a thuchiam ah a zekai kei hi; kuamah manthat deihlou a, mi tengteng hong kisik deih in noumau lam ah a dohzou zaw ahi.

¹⁰‍Himahleh Toupa ni zaw guta bang in a hongtung ding; huai ni chiang in van nakpitak a ging in a mangthang ding, thilbulte mei a haitui in a om ding a, lei leh a sung a nasep omte, a kangtum ding hi.

¹¹‍Huai thilte huchibang a mangthang vek ding uh ahi chih na theih un, omdan siangthou leh Pathian limsakna lam ah mi bangchibang hi ding na hi ua.

¹²‍Pathian ni hongtung ding lamen leh phatuamngai tak in nawh un; huai ni a tun ziak in van hongkang in a mangthang dia, thilbulte leng mei a haltui in a omta ding hi.

¹³‍Himahleh a thuchiam bang in van thak leh lei thak, a sung a diktatna omte i lamen hi.

¹⁴‍Huaiziak in deihtakte aw, huai bang thilte na lamet ziak un nin banglou leh gensiatbei in, khamuangtak a na om uh a hon muhtheihna ding in thanop suah un.

¹⁵‍Huan i unaupa deihtak Paul in leng a kiang a pilna piak bangzel a na kiang ua a gelh bang in Toupa dohzawhna hotdamna in sim un.

¹⁶A laikhak tengteng ah huai thute gen in, huai mah bang in a gelh hi. Huai ah thu theihhak thu thukte a om a, huaite mi pillou leh mi kiploute’n Laisiangthou dang a ngaikoi bang un a ngaikoi ua, amau leh amau siatna ding in a zang uhi.

¹⁷‍Huchi in deihtakte aw, noute’n tua thute na theihkholh ziak un pilvang un, huchilou in zaw migiloute diklouhna a pimang a om in, na kipna ua kipan na pukkha ding uhi.

¹⁸‍Himahleh i Toupa leh Hondampa Jesu Khrist hehpihna leh theihna ah hong khang un. Tu leh tangtawn in amah kiang ah thupina om hen, Amen.