Read Paite Chin 1 JOHAN 2 Bible Online

1 JOHAN 2 - Paite Chin bible

1 JOHAN 2

¹Ka naute aw thil na hihkhelh louhna ding un hiai thute na kiang uah ka gelh ahi. Kuapeuh in thil a hihkhelh leh Pa kiang a hon gensakpa, Jesu Khrist, mi diktat i nei hi;

²Amah i khelhnate thuphatawina ahi; eimah khelhna kia hilou in, khovel tengteng khelhna thuphatawina leng ahi.

³‍Huan a thupiakte i zuih leh huai ah amah i thei chih i kithei hi.

⁴A thupiakte zuilou a “Amah ka thei” chi mi mi zuauthei ahi, thutak amah ah a omkei hi.

⁵‍Kuapeuh a thuzui peuhmah amah ah Pathian a itna a kim petmah hi. Amah ah i om chih hiai ah i kithei ahi.

⁶Amah ah ka om gige chi mi amah om bang in a omsam ding ahi.

⁷‍Deihtakte aw, thupiak thak na kiang uah ka gelh kei a: thupiak lui a tung a kipan a na neih uh ka gelhzaw ahi. Huai thupiak lui na thu theihsa pen uh ahi.

⁸‍Himahleh thupiak thak gelh hisam na veng, huai amah ah leh noumau ah a lang hi, mial a man lellel ziak in leh vak taktak tua a hongvak tak ziak in.

⁹A unau haw napi a, vak ah ka om chi mi tutan in leng mial ah a om gige hi.

¹⁰A unau itmi vak ah a om gige a, amah ah kipalpaihna ding san a omkei hi.

¹¹A unau hawmi bel mial ah a om a, mial ah a khosa a, mial in a mit a tawtsak ziak in a paina leng a theikei hi.

¹²‍Naute aw, amah min ziak a na khelhnate uh ngaihdam a hihtak ziak in na kiang uah ka gelh ahi.

¹³‍Pate aw, amah a tung a kipan a om gige na theih ziak un na kiang uah ka gelh ahi. Tangvalte aw, Pathian thu noumau ah a om gige a, giloupa na zohtak ziak un na kiang uah ka gelh ahi. Naute aw, Pa na theih ziak un na kiang uah ka gelh ahi.

¹⁴‍Pate aw, amah a tung a kipan a om gige na theih ziak un na kiang uah ka gelh ahi. Tangvalte aw, na hat ua Pathian thu noumau ah a om gige a, migilou na zohtak ziak un na kiang uah ka gelh ahi.

¹⁵‍Khovel it kei unla, khovel a thil omte leng it sam kei un. Mi kuapeuh in khovel a it leh Pa itna amah ah a omkei hi.

¹⁶‍Khovel a thil om tengteng, sa utnate, mit utnate, damsung thupina limte Pa a kipan ahi kei a, khovel a kipan ahizaw hi.

¹⁷‍Khovel, a utnate toh, a mangthang lellel ahi. Pathian deihlam hihmi bel tangtawn in a om gige ding hi.

¹⁸‍Naute aw, hun nanungpen hita e, Khrist doupa a hongpai ding chih na zak bang un tuin leng Khrist doumi tampitak a hong pawtta uhi; huaiziak in hun nanungpen ahita chih i thei uhi.

¹⁹Amaute i lak ua kipan in a pawt ua, himahleh eimah mi tak ahi kei uh; eimah mi tak hile uh i kiang uah a omsam ding uhi; himahleh avek un eimah mitak ahi kei uh chih a latchetna ding in a hon pawtsanta uhi.

²⁰‍Mi Siangthou kiang a kipan thaunilhna na tang ua, bangkim na thei uhi.

²¹‍Thutak na theihlouh ziak ua ka gelh ahi kei a, na theih ziak uh leh thutak a zuau bangmah a pawt ngeilouh ziak in ka gelh ahizaw hi.

²²‍Jesu, Khrist ahi chih gingtalou mi sang a zuauthei kua a om a? Khrist doumi tuh Pa leh Tapa gingtalou mi ahi.

²³‍Kuapeuh Tapa gingtalou in Pa leng a sang tuankei; Tapa gingta in bel Pa leng a sang hi.

²⁴‍Nou zaw a tung a kipan a na zak uh noumau ah omsak gige un. Huai a tung a kipan a na zak uh noumau a a om gige leh nou leng Tapa leh Pa ah na om gige ding uhi.

²⁵‍Hiai ahi amah ngei in a honchiam pen; tangtawn hinna.

²⁶‍Noumau hon pimang tumte tungtang na kiang uah ka gelh ahi.

²⁷‍Nou zaw amah kiang a kipan a thaunilhna na tan uh noumau ah a om gige a, kuamah hilh na kiphamoh kei uhi; amah thaunilhna in thil tengteng a hon hilhzawk ziak in leh thudik ahi a, zuau leng a hihlouh ziak in huai in nou a honhilh bang in amah ah om gige un.

²⁸‍Huchi in naute aw, amah ah om gige un; amah a hong kilak chiang in ama ah zumlou in hangsantak in i om thei ding hi.

²⁹Amah mi diktat ahi chih na theih uleh mi kuapeuh diktatna hihmi amah a suak ahi chih na thei uhi.