Read Paite Chin 1 JOHAN 3 Bible Online

1 JOHAN 3 - Paite Chin bible

1 JOHAN 3

¹Ngai un, Pa hon itna thupi hina tel e! Pathian tate chih a i om; huai mah i hihna uh ahi hi. Hiai khong ziak in khovel in a hon theikei hi, amah a theihlouh ziak in.

²‍Deihtakte aw, tun ah Pathian tate i hi ua, bangchi’n ahia i om ding chih bel a kithei tadih kei hi; amah a hong kilak chiang in, amah bang in i om ding chih i thei hi, amah a om ngeingei bangtak in i mu ding ahi ngal a.

³Amah tung a lametna nei peuhmah amah a siangthou bang in a kihihsiangthou hi.

⁴‍Kuapeuh thil hihkhial dan ah a talek hi; dan a tatlekna khelhna ahi ngal a.

⁵Amah khelhnate lamang ding in a honglangta chih na thei uhi; Amah ah khelhna bangmah a omkei hi.

⁶‍Kuapeuh amah a om gige in thil a hihkhial kei hi; kuapeuh thil hihkhial in amah a mu kei a, amah leng a theikei hi.

⁷‍Tate aw, kuamah khem in omkei un. Diktatna hihmi amah a diktat mah bang in a diktat hi.

⁸‍Thil hihkhialmi Diabol a pawt ahi; Diabol in a tung a kipan thil a hihkhial hi. Pathian Tapa honglat napen Diabol nasepte a hih manthat theihna ding in ahi.

⁹‍Kuapeuh Pathian a suak in Pathian chi amah a a om gige ziak in thil a hihkhial kei, Pathian a suak a hih ziak in, thil a hihkhial theikei hi.

¹⁰‍Hiai ah Pathian tate leh Diabol tate a theihtheih hi; kuapeuh diktatna hihlou Pathian a suak ahi kei a, a unau itlou leng Pathian a suak ahi kei hi.

¹¹A tung a kipan thukhah na zak uh i ki-ittuah chiat ding uh chih ahi.

¹²‍Kaina, giloupa a kipan amah unau thatpa bang in omkei ni. Bangziak in ahia a thah tak? Amah thilhihte a gilou a, a unau thilhihte a dik ziak in ahi.

¹³‍Naute aw, khovel in nou a honhuat leh lamdang sa kei un.

¹⁴‍Unaute i it ziak in sihna a kipan in i pawt ua, hinna ah i lutta chih i thei uhi. Kuapeuh itna neilou sihna ah a omlai hi.

¹⁵‍Kuapeuh a unau hua tualthat ahi; tualthatmi tangtawn hinna nei a omkei uh chih na thei uhi.

¹⁶‍Hiai ah itna bang ahia chih i thei hi, aman tuh ei ading in a hinna a piaktak ziak in; en leng unaute ading in i hinna i piaksam ding ahi.

¹⁷‍Himahleh kuapeuh in khovel sum nei in, a unau tasam in mu taleh, amah lainat tuankei leh Pathian itna amah a bangchi’n a om ding?

¹⁸‍Naute aw, thu kia in itkei ni, lei kia in leng itsam keini, thilhih leh chihtaktak in hi zaw hen.

¹⁹‍Hiai in thutak a suak i hi chih hon theisak a, amah ma ah i lungtang i muangsak thak ding hi.

²⁰‍I lungtang in siamlouh a hon tansak dek chiang in chihna ahi; Pathian zaw i lungtangte sang in a lianzaw a thil bangkim a thei hi.

²¹‍Deihtakte aw, i lungtang in siamlouh a hontan kei leh Pathian lam ah i hangsan hi:

²²A thupiakte i zuih ua, a mitmuh a thil kipahhuai i hih zel ziak in i nget peuhmah amah a kipan in i muzel uhi.

²³‍Huan a thupiak hiai ahi, a Tapa Jesu Khrist min gingta lehang, aman thu a honpiak bang in ki-ittuah chiat lai lehang.

²⁴A thupiakte zuimi amah ah a om gige a, Amah mah leng amah ah a om gige hi. Huan Kha a honpiak ah amah eimau ah a om gige chih i thei uhi.