Read Paite Chin 1 JOHAN 4 Bible Online

1 JOHAN 4 - Paite Chin bible

1 JOHAN 4

¹Deihtakte aw, kha napeuh gingta kei un, himahleh khate Pathian a kipan ahi uhiam hilou chih chian un; zawlnei taklou tampi khovel a a na pawttak ziak un.

²‍Hiai ah Pathian Kha na thei ding uh, bang kha peuh Jesu Khrist sa in a hongpai chih gum Pathian a kipan ahi.

³‍Bang kha peuh Jesu gumlou Pathian a kipan ahi kei; huai tuh Khrist doumi kha, hongpai ding na zak uh ahi; tuin khovel ah a om khinta hi.

⁴‍Naute aw, Pathian a kipan na hi ua, tuate na zouta uhi; noumau a om khovel a om sang a a thupizawk ziak in.

⁵Amau khovel a ahi ua; huaiziak in khovel a bang in a pau ua, khovel in a thu uh a ngaikhia hi.

⁶‍Eite Pathian a kipan i hi ua, Pathian thei mite’n i thu a ngaikhe zel uhi; Pathian a kipanlou mite’n i thu a ngaikhe kei uhi. Hiai ah thutak Kha leh thutaklou kha i thei uhi.

⁷‍Deihtakte aw, i ki-ittuah chiat ding uh; itna Pathian a suak ahi ngal a, michih itna nei peuhmah Pathian a suak ahi khin ua, Pathian a theilai uhi.

⁸‍Itna neilou in Pathian a theikei; Pathian itna ahi.

⁹‍Hiai ah Pathian itna i tung uah a honglangta hi, amah ziak a i hin theihna din Pathian in a Tapa neihsun khovel a a honsawlna ah;

¹⁰‍Hiai ah itna a om, eite’n Pathian i it uh ka chi ahi kei, aman a hon it a, i khelhnate thuphatawina ding in, a Tapa a honsawl ka chi zaw hi.

¹¹‍Deihtakte aw, Pathian in huchitel a a hon it leh, eite leng i ki-ittuah chiat ding uh ahi.

¹²‍Kuamah in chiklai mah in Pathian a mu ngeikei hi. I ki-ittuah chiat uleh Pathian eimau ah a om gige dia, a itna leng eimau ah a kimlai ding hi.

¹³Amah ah i om gige chih leh amah eimau ah a om gige chih Kha a honpiak tak ziak in hiai ah i thei hi.

¹⁴‍Huan Pa in Tapa khovel Hondampa hihna nei in a honsawl chih i muta ua, i theisak uhi.

¹⁵‍Kuapeuh Jesu Pathian Tapa ahi chi a gum amah ah Pathian a om gige a, amah leng Pathian ah a om gige hi.

¹⁶‍Pathian in eimau adia itna a nei chih i thei ua, i gingta lai uhi. Pathian itna ahi; itna a om gige mi Pathian ah a om gige a, Pathian leng amah ah a om gige hi.

¹⁷‍Hiai ah i tung uah itna a kimta, vaihawm ni ading a laulou a i om theihna ah; amah om bang a khovel a i om ziak in.

¹⁸‍Itna ah launa a omkei, itna kim in lauhna a delhkhe zawzel hi, lauhna in gawtna a hon ngaihtuahsak; a laumi itna ah a bukim kei hi.

¹⁹Aman a hon it masak ziak in i it uhi.

²⁰‍Min, “Pathian ka it” chi in a unau haw leh amah zuauthei ahi; a unau a muhsa bawn a it ken, Pathian a muh ngeilouhpi bangchi’n a it thei dia?

²¹Amah kiang a kipan in hiai thupiak i nei uhi, kuapeuh in Pathian a it leh a unau leng a it sam ding chihna ahi.