Read Paite Chin VAIHAWMMITE 1 Bible Online

VAIHAWMMITE 1 - Paite Chin bible

VAIHAWMMITE 1

¹Joshua sih nung in hichi ahi a, Israel suante’n, “Kanante dou a ei adia hon sualsak din kua a hohtou masa dia?” chi’n TOUPA a dong uhi.

²TOUPA’N, “Judah vahoh hen. Ngai un, a khut ah gam ka peta,” a chi hi.

³Judah in a unau Simeon kiang ah, Kanante dou din ka gam tantuam ah hong paitou in. Keileng na gam tantuam ah ka hongpai sam ding, a chi hi. Huchi in Simeon a kiang ah a hohta hi.

⁴Huchi in Judah a va hoh a; Kanante leh Perizte TOUPA’N a khut uah a peta hi. Bezek khua ah mi sing khat a that uhi.

⁵Bezek khua ah Adonibezek a mu ua, a dou ua, Kanante leh Perizte a that uhi.

⁶Himahleh Adonibezek a tai a; a nungdelh ua, a man ua, a khutpi leh a khepi a tansak uhi.

⁷Adonibezek in, “Kumpipa sawmsagihte khutpi leh khepi ka tan khiaksakte’n ka dohkan nuai ah anneng a tawm uh. Ka hih banggeih a Pathian in honthuk eita ve” a chi hi. Jerusalem khua ah a pi ua, huai ah a sita hi.

⁸Judah suante’n Jerusalem khua a dou ua, a la ua, namsau in a sual ua, a khopi a hal uhi.

⁹Huai nung in Judah suante tanggam simlam leh phaizang a teng Kanante dou din a kuansuk uhi.

¹⁰Judah in Kanante Hebron khua a tengte a vadou a, A ma in Hebron min Kiriath Arba ahi; Sesai, Ahiman leh Talmai a that uhi.

¹¹Huai apan Debir khomite a dou uh, A ma in Debir khaw min Kiriath Sepher ahi.

¹²Kaleb in, Kuapeuh Kiriath Sepher khua dou a, la peuhmah ka tanu Aksah a zi din ka pe ding, a chi hi.

¹³Kaleb nau Kenaji tapa Othniel in a lazou a, a tanu Aksah a zi din a peta hi.

¹⁴Hichi ahi a, a kiang a vatun in gam ngen thei din a pa a kunzou hi. Sabiltung apan a kum khia a; Kaleb in a kiang ah, “Bang na deih a?” a chi hi.

¹⁵Aman a kiang ah, “Hon vualzawl in. Simlam gam lah n’on peta ngal a, tuinak neite leng hon pelai in” a chi hi. Kaleb in tuinak nei tungnungte leh khangnungte a peta hi.

¹⁶Mosi puzon Ken suante Arad simlam a om Judah gamdai ah Judah suante toh tum khopi apan a hohtou ua; mipite lak ah a va teng uhi.

¹⁷Judah bel a unau Simeon toh a kisa ua, Zephath khua a om Kanante a vathat ua, a hih chimit vek uhi. Huai khopi min Hormah chih ahi.

¹⁸Judah in Gaza khua leh a tuipiau, Askelon khua leh a tuipiau leh Ekron khua leh a tuipiau tan in a la hi.

¹⁹TOUPA Judah kiang ah a om a; tanggam a tengte a delhkhia a; guam a tengte bel sik kangtalaite a neih ziak un a delhkhe zou kei hi.

²⁰Mosi in a na gensa bang in Hebron khua Kaleb a pia ua, aman huai apan Anak tapa thumte a delhkhia hi.

²¹Benjamin suante’n Jebuste, Jerusalem khua a tengte a delh khe kei ua, Jebuste Benjamin suante toh tunitan in Jerusalem ah a teng khawm uhi.

²²Joseph inkuante leng Bethel khua dou din a kisa tou ua, a kiang uah TOUPA a om hi.

²³Joseph inkuante’n Bethel khua ah enkhemite a sawl uhi. A ma in huai khaw min Luz ahi.

²⁴Enkhemite’n mi khat khaw sung apan hong pawtkhia a mu ua, a kiang ah, Hehpih in khopi sung lutna hon ensak dihve, huchi in k’on hehpih ding uh, a chi uhi.

²⁵Khopi sung lutna a ensak a, namsau in huai khua a dou ua; huai mipa leh a inkuanpihte teng bel a hinghawi uhi.

²⁶Huai mipa Hitte gam ah a lut a, khua a sat a, huai khaw min Luz a sa a; tunitan in hiai min a pulai hi.

²⁷Manasseh in Beth shean khua leh a khopel a tengte, Taanak khua leh a khopel a tengte, Dor khua leh a khopel a tengte, Ibleam khua leh a khopel a tengte, Meggiddo khua leh a khopel a tengte a delhkhe kei hi. Kanante huai gam ah a teng uhi.

²⁸Hichi ahi a, Israel suante a honghat un Kanante a na sem ding un a omsak ua, a delhkhe siang vekkei uhi.

²⁹Ephraim in Gezer khua a teng Kanante a delhkhe kei a; Kanante Gezer khua ah a lak uah a teng zawta uh.

³⁰Zebulun in Kitron khua a tengte leh Nahalol khua a tengte a delhkhe kei a; Kanante a lak uah a tengsam ua, a nasem ding un a om zawta uhi.

³¹Asher in Akko khua a tengte, Zidon khua a tengte, Ahlab khua a tengte, Akjib khua a tengte, Helbah khua a tengte, Aphik khua a tengte leh Rehob khua a tengte a delhkhe kei hi.

³²Asher suante huai gam a teng Kanante lak ah a teng samta uhi; amau lah a delhkhe ngalkei ua.

³³Naphtali in Beth-shemesh khua a tengte, Beth-anath khua a tengte a delhkhe kei. Huai gam a teng Kanante lak ah a teng samta uhi. Beth-shemesh khua a tengte leh Beth-anath khua a tengte nasem din a omta uhi.

³⁴Amorte’n Dan suante tang gam ah a hawltou ua; phaizang a a paisuk uh a phal ngalkei ua.

³⁵Amorte Aijalon a Heres tang leh Shaalbim khua ah a teng ua, Joseph inkuante’n amau a zou ua, a nasem ding un a lak uah a teng uhi.

³⁶Amorte gam chiang Akrabbim tungkahna apan, suangpi apan leh Sela apan ahi.