Read Paite Chin VAIHAWMMITE 10 Bible Online

VAIHAWMMITE 10 - Paite Chin bible

VAIHAWMMITE 10

¹Huan, Abimelek sih nung in Israelte hunkhe din Issakar mi Tola a hong dingkhia hi. Amah Puah tapa ahi. Puah bel Dodo Tapa ahi. Amah Ephraim tang gam Shamir khua ah a teng hi.

²Kum sawmnih leh thum sung Israelte tung ah vai a hawm a, huchi in a sita a, Shamir khua ah a vui uhi.

³Huai nung in Gilead mi Jair a hong dingkhia a, kum sawmnih leh nih sung Israelte tung ah vai a hawm hi.

⁴Aman sabiltung nou tung a tuang tapa sawmthum a neia, amau Gilead gam ah khua sawmthum a nei ua, huaite tunitan in Havothjair a chilai uhi.

⁵Jair a si a, Kamon khua ah a vui uhi.

⁶Israel suante’n TOUPA mitmuh in thil gilou hih nawn in Baal leh Ashtaroth, Suriate pathian, Zidonte pathian, Moabte pathian, Ammon suante pathian leh Philistiate pathian na a sem uhi. Huchi in TOUPA a lehngatsan ua, Amah na a semta kei uhi.

⁷Huchi in TOUPA Israelte tung ah a hehta mahmah a, Philistiate leh Ammon suante kiang ah amaute a khawngta hi.

⁸Huai kum in amau Israel suante hihbuai in a nuaisiah uhi. Jordan gal Gilead gam a Amorte gam a Israel suan om tengteng kum sawmlehgiat sung a nuaisiah uhi.

⁹Ammon suante bel Judahte, Benjaminte, Ephraim inkawte dou din Jordan a galkah ua; huchi in Israelte a lungzing mahmah uhi.

¹⁰Israel suante’n, “I Pathian in Baalte na i nasep ziak un hon lehngat santa hi, a tung ah thil i hihkhialta uhi” chi’n TOUPA a sam uhi.

¹¹TOUPA’N Israel suante kiang ah, “Aiguptate apan, Amorte apan, Ammon suante apan leh Philistiate apan noute k’on hunkhe kei maw?”

¹²Jidonte, Amalekte leh Ammonte’n leng noute a hon nuaisiah ua; n’on sam ua, huchi in a khut ua kipan k’on hunkhia hi.

¹³Himahleh noute’n n’on lehngatsan ua, pathian dangte nna nasem zawta uh. Huaiziak in, k’on hunkhe nawn kei ding.

¹⁴Na pathian telte uh samta unla, amau na gimthuak hun un hon hunkhia uhen” a chi hi.

¹⁵Israel suante’n TOUPA kiang ah, “Thil ka na hihkhialta uh. Nang pha nasak bangbang in ka tung uah hih in. Himahleh ka hong thum uhi, tuni in hon hunkhe lai in.”

¹⁶Huchi in a lak ua namdang pathiante a koihmang ua, TOUPA na a semta uh. Aman Israelte lungzinna a thuakzou nawnta kei hi.

¹⁷Ammon suante a kikhawm ua, Gilead gam ah a va kikulh ua, Israel suante leng a kikhawm ua, Mizpah ah a kikulh uhi.

¹⁸Mipite leh Gilead gam a miliante a kihou ua, Ammon suante doupa’n ding kua a om a? Huai mi Gilead gam tengteng tung ah heutu ahi ding, a kichi uhi.