Read Paite Chin VAIHAWMMITE 11 Bible Online

VAIHAWMMITE 11 - Paite Chin bible

VAIHAWMMITE 11

¹Gilead mi Jephthah mi hat hangsan ahi a, kizuaknu tapa ahi. Gilead in Jephthah a suang hi.

²Gilead zi in tapate a suansak a; a zi tapate a hong pichin un Jephthah a delhkhia ua, a kiang ah, “Nang zaw ka pa uh inn ah gou na luah theikei ding. Numei tuam khat tapa na hih ziak in” a chi uhi.

³Huchi in Jephthah a unaute apan a taimang a, Tob gam ah a teng hi. Jephthah kiang ah mi thulimlou pipi a tengkhawm ua, amah a zuizel uh.

⁴Huai nung deuh in Ammon suante’n Israelte a douta uhi.

⁵Hichi ahi a, Ammon suante’n Israelte a dou uleh, Gilead upate Tob gam a Jephthah pi din a paikheta uhi.

⁶Jephthah kiang ah, “Ammon suante ka dou theihna ding un ka heutupen ding un hongom in” a chi uhi.

⁷Jephthah in Gilead upate kiang ah, “N’on hua ua, ka pa inn apan n’on delhkhia uh, ahi kei maw? Bang a chia na buaitak ua ka kiang a hong na hi ua?” a chi hi.

⁸Gilead upate’n Jephthah kiang ah, “Huaiziak tak ahi, tua nang lam ka hong ngat nawn uh. Ammon suante dou dia ka kiang ua na pai theihna din; Gilead gam a teng tengtengte tung ah ka heutu ding un na om ding” a chi uhi.

⁹Jephthah in Gilead upate kiang ah, “Ammon suante dou dia n’on pikik nawn ua, TOUPA’N amau a honpiak leh na heutu ding un maw, ka om ding?” a chi hi.

¹⁰Gilead upate’n Jephthah kiang ah, na thu bangbang a ka hihkei uh leh “TOUPA i kikal uah hon theihpihpa ahi ding” a chi uhi.

¹¹Huchi in Jephthah bel Gilead upate kiang ah a hohta a, mite’n heutu ding leh a pipen pen din a na bawlta uhi. Jephthah in Mizpah ah TOUPA ma ah a thu teng a genta hi.

¹²Jephthah in Ammon suante Kumpipa kiang ah, “Bangchidan a hichibang a ka gam hong dou dia ka kiang a hongpai mawk na hia?” chi in palai a sawl hi.

¹³Ammon suante kumpipa’n, “Israelte Aigupta gam apan a hong pawtlai ua, ka gam a hon laksak ziak uh ahi. Arnon apan Jabok leh Jordan tan in. Huaiziak in huai gamte lungdam in hon penawn mai in” chi in Jephthah palaite a na dawng hi.

¹⁴Huchi in Jephthah in Ammon suante kumpipa kiang ah palai a sawl nawn hi.

¹⁵A kiang ah, Jephthah in hichi in a chi, “Israelte’n Moab gam a laksak kei ua, Ammon suante gam leng a laksak sam kei uh.

¹⁶Himahleh, Aigupta gam apan Israelte a hongpawt un gamdai tawn in Tuipi San a hongtung ua, tua apan Kadesh ah a hongpai uhi.

¹⁷Israelte’n Edom kumpipa kiang ah, ‘Hehpih in na gam ah ka paisuak ding uh,’ chi in palai a sawl uh. Himahleh Edom kumpipa in a na ngaikhe nuam kei. Huchi mah bang in Moab kumpipa kiang ah a sawlnawn a, himahleh pha a na sa kei hi. Huchi in Israelte Kadesh ah a omta uhi.

¹⁸Huchi in gamdai ah a paisuak ua, Edom gam leh Moab gam kimvel in a pai ua, Moab gam suahlam pang ah a pai ua, Arnon lehlam pang ah giahphual a sat uh. Moab gam sung ah a lut kei hial uh, Arnon bel Moab gamgi chiang ahi.

¹⁹Israelte’n Amorte Kumpipa Sihon leh Heshbon kumpipa kiang ah palai a sawl uh. Israelte’n a kiang ah, ka hong thum uhi, ‘Ka mun ua ka paina ding un hehpih in na gam tawn in hon paisuaksak in,’ a chi uhi.

²⁰Himahleh Sihon in Israelte a gam a paisuak din a muangzou kei. Sihon in a mi tengteng a kaikhawm a, Jahaz ah a kikulh a, Israelte a douta hi.

²¹TOUPA, Israelte Pathian in Sihon leh a mi tengteng Israelte khut ah a pia a, amau a that uhi. Huchi in Israelte’n huai gam a om Amorte gam tengteng a tangta uhi.

²²Huchi in Amorte gamgi chiang tengteng Arnon apan Jabok pha in, gamdai apan Jordan pha in a tangvekta uhi.

²³Huchi in TOUPA, Israelte Pathian in a mi Israelte ma ah Amorte a hawlkhia a, bangziak a nang hiai gam luahthei di na hia?

²⁴Na pathian Kemos in nang a tuam dia a hon sehsaksa tang ding hilou na hi maw? Huchi in TOUPA ka Pathian un ka ma ua a hawlkhiatte uh ka tang ding uhi.

²⁵‘Moab kumpipa Jippor tapa Balak sang in na hatzaw ahia? Aman Israelte kinakpih in ahihkeileh a dou ngei himhim ahia?

²⁶Heshbon leh a khopelte, Aroer leh a khopelte, Arnon gamgi naih khopi tengteng a kum za thum tak a tenlai ua, bangdia nang a na lakik lou nilouh na hia?

²⁷Huaiziak in, na tung ah thil bangmah ka hihkhial kei hi. Nangman hondou na tup ziak in ka tung ah thil na hihkhial ahi. TOUPA, Vaihawmpa in tuni in Israel suante leh Ammon suante kal a thu ngaihtuah hen” a chi hi.

²⁸Himahleh Ammon suante kumpipa’n Jephthah thukhah a na ngaikhe nuam kei hi.

²⁹Huchi in TOUPA kha Jephthah tung ah a hongtung a, Gilead leh Manasseh gam ah a paisuak a, Gilead a Mizpah ah a paisuak a, Gilead gam Mizpah apan Ammon suante kiang ah a pai zel hi.

³⁰Jephthah TOUPA kiang ah a kichiam a, “Ammon suante ka khut a na honpiak leh,

³¹Hichi ahi ding a, Ammon suante apan galmuanga ka pai kiknawn chiang in bang peuh ka inn kongpi apan a hon dawn masa penpen TOUPA a ahi dia, haltum thillat din ka zang ngeingei ding” a chi hi.

³²Huchi in Jephthah bel Ammon suante dou din a kuanta hi. TOUPA’N a khut ah amaute a peta hi.

³³Aroer apan Minnith pha leh Abel Keramim kal a khopi sawmnih a zou vek a, mi tampi a that hi. Huchi in Israel suante’n Ammon suante a nuaisiahta uhi.

³⁴Jephthah a tenna khua Mizpah a a inn ah a pai a, ngai in, a tanu in khuangtate toh lam in a na dawn hi. A ta neihsun ahi a; amah lou tapa leh tanu dang himhim a neikei hi.

³⁵Hichi ahi a, amah a muhtak in a puante a botkek a, “Ehe, ka tanu! N’on niamkiak sak mahmah ve. Hon mangbangsak mite lak a khat na hita. TOUPA ma ah lah ka kam ka na kata ngal a, huai lah zukkik thei ka hita kei” a chi hi.

³⁶Aman a kiang ah, “Pa, TOUPA hih ding ahi. TOUPA’N na melma Ammon suante tung ah lah na phu a hon laksakta ngal a” a chi hi.

³⁷Aman a pa kiang ah, “Hichibang in kei adin kihih hen. Kha nih sung ka tang om dia, tangte ah a suk a tou in ka pai dia, ka nungak siangthou hihna ka sun ding, kei leh ka lawmte’n,” a chi hi.

³⁸Aman, “Pai ve” a chi hi. Huchi in kha nih tam din a sawlkhia a; a pawt a, amah leh a lawmte’n tangte ah a nungak siangthou hihna a va sun uhi.

³⁹Hichi ahi a, kha nih nung in a pa kiang ah a hong kiknawn a, aman a na kichiamsa bang in a tung ah a hih hi. A tanu nungak siangthou in a omdenta a, pasal toh a lumkhawm ngeikei hi.

⁴⁰Israel tanute’n Gilead mi Jephthah tanu kum teng in ni li sung a sun zel uhi. Hiai Israelte lak ah ngeina in a neita uhi.