Read Paite Chin VAIHAWMMITE 12 Bible Online

VAIHAWMMITE 12 - Paite Chin bible

VAIHAWMMITE 12

¹Huan, Ephraimte a kikaikhawm ua, mallam zuan in a pai ua; Jephthah kiang ah, “Bangdia Ammon suante dou dia hongpai phei a, na kiang a hoh dia hon chial sam lou? Na inn toh k’on buhal khawm ding uh” a chi uhi.

²Jephthah in a kiang uah, “Ammon suante ka mite toh theihtawp suah in ka dou ua; k’on saplai in a khut ua kipan in lah n’on hunkhe utkei ua.

³Huchi in n’on hunkhe nuam kei uh chih ka theih tak in, sih khawk salou hial in ka pang a, Ammon suante dou din ka kuan a, huchi in TOUPA’N maute ka khut ah a honpia hi. Huaiziak in bangdia hondou dia tuni a hong kuan na hi ua?” a chi hi.

⁴Huchi in Jephthah in Gilead mi tengteng a kaikhawm a, Ephraimte a douta hi. Gileadte’n Ephraimte a that uh. “Nou Gileadte, Ephraimte leh Manassehte lak a galtai vakvai maimaite na hi uh” a chih ziak un.

⁵Gileadte’n Ephraimte ma in Jordan lui kainate a na la ua; hichi ahi a, Ephraimmi suaktate’n, “Ka hong galkah ding uh” a chih chiang un Gileadte’n a kiang ah, “Ephraim mi na hi hia?” a na chi zel uh. Aman, “Hilou e,” a chih leh,

⁶A kiang ah, “Shiboleth, chimah dih” a na chi ua, aman, “Siboleth” a chi zawzela; a loutel theikei hi. Huchi in a man ua, Jordan lui kainate ah a na that zel uh. Huchi in huai tung in Ephraimte sing li leh sang nih a that uhi.

⁷Jephthah in Israelte tung ah kum guk vai a hawm a, huchi in a sita a, Gilead gam a khua khat ah a vui uhi.

⁸A nung in Bethlehem khua a mi Ibzan in Israelte tung ah vai a hawm hi.

⁹Aman tapa sawmthum leh tanu sawmthum a nei hi. A tanute gamdang ah a sawl a, a tapate adin gamdang apan tanu sawmthum a pisak hi. Aman Israelte tung ah kum sagih vai a hawm hi.

¹⁰Ibzan a sita a, Bethlehem khua ah a vui uh.

¹¹A nung in Zebulun mi Elon in Israelte tung ah vai a hawm a; Israelte tung ah kum sawm vai a hawm hi.

¹²Zebulun mi Elon a sita a, Zebulun gam a Aijalon khua ah a vui uhi.

¹³Huai nung in Pirathon mi, Hilel tapa Abdon in Israelte tung ah vai a hawm hi.

¹⁴Aman tapa sawmli leh tupa sawmthum leh sabiltung nou sawmsagih tung a tuangzel tupa sawmthum a nei hi. Aman Israelte tung ah kum giat vai a hawm hi.

¹⁵Pirathon mi, Hilel tapa Abdon a sita a, Ephraim gam, Amalek mite tanggam ah Pirathon khua ah a vuita uh.