Read Paite Chin VAIHAWMMITE 13 Bible Online

VAIHAWMMITE 13 - Paite Chin bible

VAIHAWMMITE 13

¹Huan Israel suante’n TOUPA mitmuh in thil gilou a hih nawn ua; huchi in TOUPA’N Philistiate khut ah amaute kum sawmli sung a pia hi.

²Zoreah khua ah Dan nam mi khat a om a, a min Mano ahi a, a zi bel a ching a, nau a neikei hi.

³TOUPA angel numei kiang ah a hong kilak a, a kiang ah, “Ngai in, ching a, nau nei theilou himah lechin na gai dia, tapa na nei ding hi.

⁴Huchi in pilvang in, uain leh zu hat leh sianglou thil himhim ne het ken.

⁵‘Ngai in, na gai dia, tapa nei ding na hi ngal a. A lu ah mulmet tem himhim zat ahi kei dia, naupang bel sul a a omlai apan Pathian adia Nazarit hi ding ahi ngal a’. Aman Israelte Philistia mite khut apan hutkhiak apan ding” a chi hi.

⁶Numei in a pasal kiang ah, “Pathian mi khat ka kiang ah a hong a, a mel Pathian angel mel bang ahi a, kihtakhuai tak ahi. Koilam mi ahia chih bel ka dong chit chiat kei a, aman lah a min a honhilh sam kei hi.

⁷Himahleh ka kiang ah, Ngai in, na gai dia, tapa na nei ding. Huchi in uain leh zu hat himhim dawn kenla, sianglou thil himhim leng ne het ken. Naupang sul a a omlai apan a sih tan in Pathian adia Nazarit mi hi ding ahi, a chi” chi’n a gen hi.

⁸Huchi in Mano in TOUPA kiang ah nget chihtak in a ngen a, a kiang ah, “Aw TOUPA hehpih in huai Pathian mi na honsawl ka kiang uah hong nawn henla, naupang hong piang ding bang ka chih ding ua hong sinsak hen” a chi hi.

⁹Pathian in Mano thugen a na ngaikhia hi. Numei pawna a tutlai in a kiang ah Pathian angel a hong nawn hi. A pasal Mano bel a kiang ah a omkei hi.

¹⁰Numei kintak in a tai paha, a pasal a va hilh a, a kiang ah, “Ngai in, zanlam a ka kiang a hong hohpa ka kiang ah a hong kilak nawn hi” a chi hi.

¹¹Huchi in Mano a thou a, a zi a zui a, huai mi kiang a va tung uhi. A kiang ah, “Numei kiang a thu gen nang na hi maw?” a chi hi. Aman, “Hi e,” a chi hi.

¹²Mano in, “Na thu bangzel in hongtung hen. Naupang om ding dan bangchibang ahi dia, a sep ding bang ahi dia leh?” a chi hi.

¹³TOUPA angel in Mano kiang ah, “Numei kiang a ka gen tengteng ah amah pilvang hen.

¹⁴Grepgui apan mawngmawng a ne ding ahi kei a, uain leh zu hat a dawn ding ahi kei. Sianglou thil mawngmawng leng a ne ding ahi kei. Ka thupiak tengteng zui hen, a chi hi.

¹⁵Mano in TOUPA angel kiang ah, ka hong thum uh. Hehpih in hon ompih lai in, kelnou k’on bawlsak khit matan uh, a chi hi.

¹⁶TOUPA angel in Mano kiang ah, “Honkhou lechin leng na an zaw ka ne kei ding. Haltum thil lan ding na hihleh TOUPA kiang a na lat ngeingei ding ahi” a chi hi. Mano in lah TOUPA angel ahi chih a thei ngal kei hi.

¹⁷Mano in TOUPA angel kiang ah, “Na min bang ahia, na thugen bang a hongtun chiang a k’on pahtawi theihna ding un?” a chi hi.

¹⁸TOUPA angel in a kiang ah, “Bangdia ka min hon dong na hia, thuguk ahi chih theizen napi a?” a chi hi.

¹⁹Huchi in, Mano in kelnou khat leh nekding thillat a la a; suangpi tung ah TOUPA kiang ah a lan hi. Angel in thillamdang tak a hih a, Mano leh a zi in a en nilouh uhi.

²⁰Hichi ahi a, maitam apan meikuang vanlam a a kahtouh lai in, TOUPA angel maitam a meikuang ah a paitouta hi. Mano leh a zi in a en nilouh ua, a maitang un lei a si uhi.

²¹Himahleh TOUPA angel Mano leh a zi kiang ah a hong kilak nawn kei hi. Huchi in Mano in TOUPA angel ahi chih a theita hi.

²²Mano in a zi kiang ah, “Pathian i muh ziak in i si ngeingei ding” a chi hi.

²³Himahleh a zi in a kiang ah, “TOUPA’N hon hihlup tum hileh haltum thillat leh nekding thillat i latte a sang kei ding. Hiai thil tengteng leng a hon ensak kei ding. Tu hun in hiai thilte leng honhilh kei ding, a chi hi.

²⁴Numei in Tapa a neita a, a min Samson a sa uh. Naungek a hong khang lian a, TOUPA’N a vualzawl hi.

²⁵Zoreah leh Eshtaol kikal ah Mahaneh Dan mun ah TOUPA kha in a tokthouta hi.