Read Paite Chin VAIHAWMMITE 14 Bible Online

VAIHAWMMITE 14 - Paite Chin bible

VAIHAWMMITE 14

¹Huan, Samson bel Timnah khua ah a hohsuk a, Timnah khua ah Philistiate tanute lak ah numei khat a va mu hi.

²A hong paitouh nawn in a nu leh a pa a hilh hi. “Timnah khua ah, Philistiate tanute lak ah numei khat ka mu a; ka zi din hon pisak un” a chi hi.

³Huchi in a nu leh apan a kiang ah, “Na unaute tanute lak ah hiam, ka mipite lak a hiam numei om hetlou hia? Zeksumlouh Philistiate lak a zi ding na va zon maimah?” a chi uhi. Samson in a pa kiang ah; “Hon pisak mai in; aman a hon lungkim sak mahmah ahi” a chi hi.

⁴Himahleh a nu leh apan, hiai TOUPA apan ahi chih a theikei uhi. Toupa’n Philistiate tung a phulakna ding hun lemtang zong lah ahi ngal a. Huailai in Philistiate’n Israelte tung ah vai a hawm uhi.

⁵Huchi in Samson bel a nu leh a pa toh Timnah khua ah a hohsuk ua, Timnah khua a grephuan a va tung uh. Ngai in, humpinelkai lunlai a na humham hi.

⁶TOUPA kha a tung ah nakpitak in a hongtung hi. Huchi in kel nou balnen bang mai in a balnen maimah hi; bangmah lah a tawi kei a. Himahleh a thilhih a nu leh a pa a hilh kei hi.

⁷A hohsuk a, huai numei a houpih hi. Aman Samson a kipaksak mahmah hi.

⁸A nung in vapi din a hoh nawn a, humpinelkai luang en ding in a vapial hi. Ngai in, humpinelkai luang ah khuai hon leh a zu a na om hi.

⁹Huai a la a, a pai nawn a, a paikawm in a ne kawmkawm hi. A nu leh pa kiang a tungtou a, amau leng a pia a, amau leng a ne sam uhi. Himahleh huai khuaizu humpinelkai luang apan a lak ahi chih a hilhkei hi.

¹⁰Huchi in a pa numei kiang ah a va hohsuk a, huai ah Samson in Ankuang a lui hi. Huai ahihleh tangvalte hihdan ahi him hi.

¹¹Hichi ahi a, amah a muhtak un, a kiang a om din mi sawmthum a pi uhi.

¹²Samson in a kiang uah, “Tuin thuhaksa hondong ning e. Ankuanglui ni, ni sagih sung a n’on hilhchet theih ua, na theihkhiak theih uleh puanmalngat silh sawmthum k’on pe ding.

¹³Himahleh n’on hilhchet theihkei uleh, puanmalngat silh sawmthum leh kikhenna puan sawmthum n’on piak ding uh ahi” a chi hi. Amau a kiang ah, “Na thuhaksa gen dihve leh, ka na ngaikhe ding uh” a chi uhi.

¹⁴Aman a kiang uah, “Netu apan nekding hongpawt, hattak apan thil khumtak hongpawt” a chi hi.

¹⁵Ni thum sung in huai thuhaksa a hilhchian theikei uh. Huchi in hichi ahi a, a ni sagih ni’n Samson zi kiang ah, “Ka kiang ua hiai thuhaksa hilhchetna puangkhe din na pasal kun in. Huchilou in zaw nang leh na pa inkawte k’on hal ding uh. Ka neihsa uh la dia honsam na hi kei maw?” a chi uhi.

¹⁶Huchi in Samson zi a ma ah a kapa, “N’on it kei a, n’on hawzaw ve. Ka chite lah thuhaksa na dong ngal a, kei bel n’on hilhchian kei” a chi hi. Aman a kiang ah, “Ngai in, ka nu leh pa leng ka hilh kei a; nang k’on hilh dia hia?” a chi hi.

¹⁷A Ankuanglui uh, ni sagih sungteng a ma ah kapkap hi. Hichi ahi a, a ni sagih ni’n a nget ngutngut ziak in a hilh khongkhong hi. Aman thuhaksa hilhchetna a chite a va hilhta hi.

¹⁸A ni sagih ni, nitum ma in huai khua a mite’n a kiang ah: “Khuaizu sang a khum zaw bang ahia? Humpinelkai sang a hatzaw bang ahia?” a chi uhi. Aman a kiang uah, “ka bawngla in leilet kei le uchin zaw, ka thuhaksa thei khe lou ding hive uchin,” a chi hi.

¹⁹Toupa kha a tung ah nakpitak in a hongtung a, Ashkelon khua ah a hohsuk hi. Mi sawmthum a va that a, a puansilhte uh a hawksak a, kikhenna puante thuhaksa hilhchiante a pia hi. Huchi in a heh mahmah a, a pa inn ah a paitou hi.

²⁰Himahleh Samson zi pen apan a kitenna ua theihpih a pang Samson lawmpa kiang ah zi ding in a pia hi.