Read Paite Chin VAIHAWMMITE 15 Bible Online

VAIHAWMMITE 15 - Paite Chin bible

VAIHAWMMITE 15

¹Himahleh hichi ahi a, a nung sawtlou in, buhlak hun in, Samson in kelnou tawi in a zi a va veh hi. Dantan sung ah ka zi kiang ah ka valut ding, a chi hi. Himahleh apan a lut a phalta kei hi.

²Apan, “Amah na haw mahmah ka sa hi. Huaiziak in na lawmpa kiang ah ka peta hi. A nau amah sang in a melhoih zaw hilou hia?” a chi hi.

³Samson in, “Tutung in Philistiate khoih leng amau sang in dem ka kai kei zaw ding” a chi hi.

⁴Huchi in Samson in sihal za thum a va man a, meisel a la a, a mei uleh mei a peh khawm a, a mei uh kikal chiat ah meisel a koih chiat hi.

⁵Meiselte a det tak in Philistiate buhlak ah a tailut sak a, buhphal leh buh ding laite, olive munte toh nangawn in a kangvek hi.

⁶Huchi in Philistiate’n, “Kua hih ahia?” a chi uh. Amau, “Timnah khua a mi makpapa Samson hih ahi. Huai Timnah khua a mi in Samson zi a lawmpa zi dia a piak man ahi” a kichi uhi. Huchi in Philistiate a hong kuan ua a pata un a hallumta uhi.

⁷Samson in a kiang uah, “Hichibang na hih uh leh na tung uah phu ka la sam ding, huaikhit in ka tawp ding” a chi hi.

⁸Huchi in nakpitak in a sual a, tampi a that a, a paisuk a, Etam suangpi tung ah a omta hi.

⁹Huchi in Philistiate a hohtou ua, Judah gam ah a va kikulh ua, Lehi mun ah a kiphalh uhi.

¹⁰Judah gam a mite’n, “Bangchidan ahia kou sualdia na hong kuan mawk uh?” a chi uhi. Amau, “Samson khaukhih a ka tung ua a hih mah bang a amah tung a leng hih din ka hong uhi” a chi uhi.

¹¹Huchi in Judah gam a mi sang thum Etam suangpi tung ah a hoh ua, Samson kiang ah, “Philistiate i tung ua vaihawmmite a hih uh theilou na maw? Bangchidan a hichibang a ka tung ua thil hon hihta mai na hia oi?” a chi uh. Aman a kiang uah, “Ka tung a, a hih bang ua ken leng amau tung a hihsam ka hi” a chi hi.

¹²Amau a kiang ah, “Nang hon khaukhih a, Philistiate khut a honpe dia hong kuan ka hi uh” a chi uh. Samson in a kiang uah, “Noute’n honthat lou din ka kiang ah kichiam un” a chi hi.

¹³Amau a kiang ah, “That lou e. Himahleh k’on khaukhih chinten ding ua, a khut ua honpe ding ka hi uh. Thah zaw k’on that kei hial ding uh” a chi uhi. Huchi in khauzen thak nih in a khih ua, suangpi apan a pita uhi.

¹⁴Lehi mun a hongtun in, Philistiate’n a na dawn ua, a na kikou zuazua uhi. TOUPA kha a tung ah nakpitak in a hongtung a, huchi in a ban a gakna khauzen jija zang mei in kangtat bang mai a hong hita a, a gaknate a khut apan a kekhe niang maimah uhi.

¹⁵Sabiltung khaguh thak a mu a, a sawk a, a la a, huai in mi sang khat a satlum hi.

¹⁶Samson in, Sabiltung khaguh in ka chiang vum venvon a, sabiltung khaguh in mi sang khat ka satlum, a chi hi.

¹⁷Hichi ahi a, a thugen khit in a khaguh tawi a pai a; huai mun Ramath Lehi a sa hi.

¹⁸A dang a tak mahmah a, TOUPA a sam a, “Nang na sikha khut zang in thupitak in n’on hunkheta hi. Tuin dangtak in ka si ding maw? Zeksum louhte khut ah ka puklut dia hia?” a chi hi.

¹⁹Himahleh Pathian in Lehi mun a leikuak a khisak a, tui a hong kikhoh kheta hi. Huai a dawntakin a lungsim a honghalh a, a honghat nawnta hi. Huai mun min En hakkore a sa a; tunitan in Lehi mun ah a omlai hi.

²⁰Huchi in Philistiate hun in Israelte tung ah kum sawmnih vai a hawm hi.