Read Paite Chin VAIHAWMMITE 16 Bible Online

VAIHAWMMITE 16 - Paite Chin bible

VAIHAWMMITE 16

¹Huan, Samson bel Gaza khua ah a hoh a, huai ah numei kizuak khat a va mu a, a va luppih hi.

²“Samson hiai ah a honghoh,” chi in, Gaza mite a hilh uhi. Huchi in a va umta ua, khopi kulh kongpi chin ah zankhua in a tang uh. Zankhua in a daisipsip ua, “Khua hongvak peuhmah leh, huchi in that na ni” a kichi uhi.

³Samson bel zankim tan in a luma, zankimin a thou a, khopi kulh kongkhakte leh a khuam nih a len a, a kalhnate toh a phawi kheveka, a liangzang ah a pua a, Hebron ma a mualvum ah a pawtou hi.

⁴Hichi ahi a, a nung in Sorek guam a numei khat a it a, a min Delailah ahi.

⁵Philistia miliante a kiang ah a hohtou ua, a kiang ah, “Amah ka zoh theihna ding un, a hatna san theihtum in kankhia in. Huchi in ka vek un dangka sang khat leh za khat k’on pe chiat ding uh” a chi uhi.

⁶Huchi in Delailah in Samson kiang ah, “Na hat mahmahna san honhilh dihve. Bangchi’n ahia hihnat dia khau khihtheih na hih ding?” a chi hi.

⁷Samson in a kiang ah, “Khauhual thak, keu nailou sagih in hon hen le uchin, ka hat kei dia, midang banglel mah ka hi ding” a chi hi.

⁸Huchi in Philistiate miliante’n khauhual thak sagih, keu nailou a pia ua, aman huaite in a henta hi.

⁹Dantan sunggil ah guktanmite a koih a, a kiang ah, “Samson, Philistiate’n hon sualdek uh e” a chi hi. Aman Khauhual mei in jija khaulom a kangtat bangphet in a hihtatta hi. Huchi in a hatna san a theikhe zoukei hi.

¹⁰Delailah in Samson kiang ah, “Ngai in, n’on khem a, zuau honhilh na hi. Bangchi a hen theih ding na hia? Hon hilhta in” a chi hi.

¹¹Aman a kiang ah, “Khauzen thak, zat nailouh in hon hen le uh, huchi in ka hatkei mai ding, midang banglel mah ka hi ding” a chi hi.

¹²Delailah in khauzen thak a la a, a hen a, a kiang ah, “Samson, Philistiate’n a hon sualdek uh” a chi hi. Dantan sunggil ah guktanmite a om uhi. A khut a henna patzang suktat bang mai in a hihtatta hi.

¹³Delailah in Samson kiang ah, “N’on khemlai a, zuau n’on hilh lai hi. Bangchi a hen theih ding na hia? honhilh dihve” a chi hi. Aman a kiang ah, “Ka sam phek sagih puan in gatkhum leteh ahimai” a chi hi.

¹⁴Aman kilhna in a kilhkip giugeu a, a kiang ah, “Samson Philistiate’n hon sualdek uh e,” a chi hi. Huchi in ihmu lai a honghalh a, puanbu kilhdenna leh puanbu nangawn toh kikhong sak in a paikhia hi.

¹⁵A kiang ah, “Na lungtang honpe hetlou pi in, bangchidan a k’on it, chi thei na hia oi? Tun thumvei hilhial n’on khemta hi, na hat mahmahna san n’on hilh nai kei lailai” a chi hi.

¹⁶Hichi ahi a, niteng in a ngen ngutngut a, a dotdot ziak in, sih ding khop hial in a lunggimta hi.

¹⁷Huchi in a lungsim tengteng a hilhvekta hi. A kiang ah, “Ka lu ah mulmettem himhim zat ahi ngei naikei hi. Ka nu sul a ka omlai apan Pathian adia Nazarit mi dia na om ka hi. Tuin metta leng, ka hatna a mang vek ding, huchi in ka hat kei dia, midang banglel ka hi ding” a chi hi.

¹⁸A lungsim tengteng a hilhvekta chih Delailah in a theih phet in, “Tu kia honghoh un, a lungsim tengteng a honhilh vekta” chi’n Philistia miliante thukhak in a samsak hi. Huchi in Philistia miliante a kiang ah a va hohtou ua, dangka a tawi uhi.

¹⁹A pheipi tung ah a ihmu sak hi. Mi a sam a, a samphek sagihte a metkhe sakvek hi. Huchi in amah a hih genthei panta a, a hatna in a nusiata hi.

²⁰“Samson, Philistiate’n a hong sualdek uh e” a chi hi. Ihmu lai a honghalh a, “Nidang mah bang in ka pawt nawn ding, ka kitungkhe nawn ding” a chi hi. Himahleh TOUPA’N a paisan khinta chih himhim a theikei hi.

²¹Philistiate’n a man ua, a mitte a khelkhiak sak uh. Gaza khua ah a paipih suk ua, Sikkol a bunsak ua; suangkulh ah buh gawizantu in a pang hi.

²²Himahleh a sammet ahihnungin hongpou in a hongkhang nawn hi.

²³Philistia miliante Dagon pathian kiang a kithoihna thupitak lan ding leh kihih nuamsa din a kikhawm uh. “I pathian un i melmapa uh Samson a honpeta” a chi uhi.

²⁴Mipite’n a muh un a pathian uh a phat ua, “I pathian un i melmapa, i gam hihsia a mi tampite thatpa i khut uah a honpeta” a chi uhi.

²⁵Hichi ahi a, a lungtang un nuam a saklaitakin, Samson pen muhnop din vasam dih ua, a chi uhi. Huchi in Samson suangkulh apan a va sam khia uhi. A ma uah muhnop din a omta a; khuam leh khuam kikal ah a dingsak uhi.

²⁶Samson in amah kaitu naupang kiang ah, “Hiai inn doupen khuam hon khoihsak dihve, k’on ngaideh” a chi hi.

²⁷Huai inn ah pasal leh numei in a dim miuhmeuh uhi. Philistiate milian tengteng huai ah a omvek ua, Samson muhnop dia enmite intung ah pasal leh numei sang thum a om uhi.

²⁸Samson in TOUPA a sam a, “Aw TOUPA Pathian, hehpih in hon theigige inla, hehpih in tutung in hon hihhat in, aw Pathian, ka mit lang nih phu Philistiate tung ah tu kia hon lasak in” a chi hi.

²⁹Samson in, huai inn doupen sut nihte a len a, a khut taklam in khat, a khut veilam in khat mah a pansan hi.

³⁰Samson in, “Philistiate toh sikhawm ning” a chi hi. Huchi in theihtawp in a kunsuk a; miliante leh mipi asung a om tengtengte huai inn chim in a delhkhumta hi. Huchi in a damlai a a thahte sang in a sihkhumte a tamzaw uhi.

³¹Huchi in a unaute leh a pa inkawte tengteng a hong paisuk ua, a la ua a zawngtou ua, Zoreah leh Eshtaol kikal a; a pa Manoa kivuina mun ah a vuita uhi. Huchi in aman kum sawmnih sung Israelte tung ah vai a hawm hi.